കഴിഞ്ഞ ദിവസമാണ് നടന്‍ അജിത്ത് ആശുപത്രിയിലാണെന്ന് വാര്‍ത്തകള്‍ നിറഞ്ഞത്. പതിവ് ചെക്കപ്പിനായാണെന്നും ആരോഗ്യനില മോശമാണെന്നും റിപ്പോര്‍ട്ടുകളുണ്ടായിരുന്നു. എന്നാല്‍ സ്ഥിരീകരണമുണ്ടായിരുന്നില്ല. ഇപ്പോഴിതാ താരം ആശുപത്രി വിട്ടെന്ന റിപ്പോര്‍ട്ടുകളാണ് പുറത്തുവരുന്നത്. താഴെ ശസ്ത്രക്രിയയ്ക്ക് വിധേയനായ ശേഷമാണ് ആശുപത്രി വിട്ട് വീട്ടിലെത്തിയത്. താരത്തിന്റെ ചെവിയ്ക്കായിരുന്നു ശസ്ത്രക്രിയ.
ചെവിയുടെ താഴെ നീര്‍വീക്കവുമായിട്ടാണ് താരത്തിനെ ആശുപത്രിയില്‍ പ്രവേശിപ്പിച്ചത്. ശസ്ത്രക്രിയയ്ക്ക് പിന്നാലെ താരത്തിന് കുറച്ചുദിവസം വിശ്രമം നിര്‍ദേശിച്ചിട്ടുണ്ട് ഡോക്ടര്‍മാര്‍. വിശ്രമ ശേഷമാകും താരം ഷൂട്ടിംഗ് തിരക്കിലേക്ക് എത്തുക.
വിദേശത്ത് പോകുന്നതിന് മുമ്പ് അജിത്ത് സ്ഥിരമായി വൈദ്യപരിശോധന നടത്താറുണ്ട്. ഇത്തവണത്തെ പരിശോധനയില്‍ ചെവിക്ക് താഴെ ഞരമ്പുകള്‍ക്ക് ബലക്കുറവുണ്ടെന്ന് ഡോക്ടര്‍മാര്‍ കണ്ടെത്തി. അതിനുള്ള ചികിത്സയാണ് ഇപ്പോള്‍ കഴിഞ്ഞത്. ശസ്ത്രക്രിയയ്ക്ക് ശേഷം ഐസിയുവില്‍ നിന്ന് സാധാരണ വാര്‍ഡിലേക്ക് മാറ്റി. ശേഷമാണ് ഡിസ്ചാര്‍ജ് ചെയ്തതെന്നും താരത്തിന്റെ മാനേജര്‍ സുരേഷ് ചന്ദ്ര പറഞ്ഞു.
വിടാമുയര്‍ച്ചിയാണ് അജിത്തിന്റെ പുതിയ ചിത്രം. ഷൂട്ടിംഗ് പുരോഗമിക്കുന്ന ചിത്രത്തിന്റെ അസര്‍ബൈജാന്‍ ഷെഡ്യൂളില്‍ ജോയിന്‍ ചെയ്യാന്‍ പോകുന്നതിന് മുന്‍പായിരുന്നു പരിശോധന.’കലഗ തലൈവന്‍’ എന്ന ചിത്രത്തിനു ശേഷം മഗിഴ് തിരുമേനി സംവിധാനം ചെയ്യുന്ന ചിത്രമാണ്. അജിത്തിന്റെ കരിയറിലെ 62-ാം ചിത്രവുമാണ്. അര്‍ജുന്‍, തൃഷ തുടങ്ങിയ താരനിരയാണ് ചിത്രത്തിലെത്തുന്നത്.