വിവാഹ ജീവിതത്തിലേക്ക് കടന്നതിന് പിന്നാലെ സന്തോഷ വാർത്ത പങ്കുവെച്ച് നടി അമല പോൾ കഴിഞ്ഞ ദിവസം എത്തിയിരുന്നു. ഗർഭിണിയാണെന്ന വിവരമാണ് നടി ആരാധകരെ അറിയിച്ചിരിക്കുന്നത്. വിവാഹിതയായി രണ്ട് മാസത്തിനുള്ളിലാണ് അമല പോൾ ഈ സന്തോഷ വാർത്ത ആരാധകരെ അറിയിച്ചിരിക്കുന്നത്. കഴിഞ്ഞ വർഷം നവംബർ മാസമാണ് അമല പോളും ജഗത് ദേശായിയും വിവാഹിതരായത്. ആഘോഷപൂർവം നടന്ന ഈ വിവാഹത്തിൽ ഇരുവരുടെയും ബന്ധുക്കളും സുഹൃത്തുക്കളുമെല്ലാം പങ്കെടുത്തു. ആദ്യ വിവാഹബന്ധം പരാജയപ്പെട്ടെങ്കിലും രണ്ടാമത് വിവാഹിതയായ ശേഷം അമല പോൾ അതീവ സന്തോഷവതിയാണെന്ന് ആരാധകർ പറയുന്നു. ഭർത്താവിനൊപ്പമുള്ള ചിത്രങ്ങൾ നടി സോഷ്യൽ മീഡിയയിൽ പങ്കുവെക്കാറുണ്ട്. നിരവധി പേരാണ് മാതാപിതാക്കളാകാൻ പോകുന്ന അമല പോളിനും ജഗത് ദേശായിക്കും ആശംസകൾ അറിയിച്ചത്. കാജൽ അഗർവാൾ ഉൾപ്പെടെയുള്ള സെലിബ്രിറ്റികളും അമല പോളിന് ആശംസയറിയിച്ചു. ഇക്കൂട്ടത്തിൽ പേളി മാണിയുടെ ആശംസയാണ് ശ്രദ്ധ നേടുന്നത്.
കുറച്ച് കാലം സിനിമാ രംഗത്ത് നിന്നും മാറി നിന്ന അമല അടുത്തിടെയാണ് കരിയറിൽ വീണ്ടും സജീലവമായത്. കഡാവർ എന്ന തമിഴ് ചിത്രത്തിലൂടെ തിരിച്ചെത്തിയ അമല മലയാളത്തത്തിൽ ടീച്ചർ, ക്രിസ്റ്റഫർ എന്നീ സിനിമകളും ചെയ്തു. ആടുജീവിതം, ലെവൽ ക്രോസ് എന്നീ സിനിമകൾ അമലയുടേതായി ഇനി പുറത്തിറങ്ങാനുണ്ട്. തമിഴിലും നടിയുടെ ഒന്നിലേറെ ചിത്രങ്ങൾ റിലീസ് ചെയ്യാനുണ്ട്. മലയാളിയായ അമല പോളിനെ ഇന്നത്തെ താരമാക്കി മാറ്റിയത് തമിഴ് സിനിമാ ലോകമാണ്. മൈന എന്ന തമിഴ് ചിത്രത്തിലൂടെയാണ് അമല പോൾ തമിഴകത്ത് ശ്രദ്ധിക്കപ്പെടുന്നത്. പിന്നീട് തുടരെ ഹിറ്റ് സിനിമകൾ നടിക്ക് ലഭിച്ചു. മലയാളത്തിൽ നീലത്താമര ഉൾപ്പെടെയുള്ള സിനിമകളിൽ ചെറിയ വേഷം ചെയ്ത അമല പോൾ പിന്നീട് റൺ ബേബി റൺ, ഒരു ഇന്ത്യൻ പ്രണയകഥ തുടങ്ങിയ സിനിമകളിലൂടെ ഹിറ്റ് നായികയായി മലയാളത്തിലും അറിയപ്പെട്ടു. കരിയറിലെ ഏറ്റവും മികച്ച സമയത്ത് നിൽക്കവെയായിരുന്നു അമലയുടെ ആദ്യ വിവാഹം. സംവിധായകൻ എഎൽ വിജയുമായുള്ള പ്രണയ വിവാഹം ഏറെ ചർച്ചയായി. 2014 ൽ വിവാഹിതരായ ഇരുവരും 2017 ൽ വേർപിരിയുകയാണുണ്ടായത്. ഇതേക്കുറിച്ച് നിരവധി ഗോസിപ്പുകൾ വന്നു. വിജയുടെ കുടുംബവുമായി അമലയ്ക്ക് അസ്വാരസ്യങ്ങളുണ്ടായെന്നാണ് വിവരം. ഇതേക്കുറിച്ച് പ്രതികരിക്കാൻ അമല പോളോ എഎൽ വിജയോ തയ്യാറായിട്ടുമില്ല.