ധനുഷും മമ്മൂട്ടിയും ആദ്യമായി പ്രധാന വേഷങ്ങളിൽ ഒന്നിക്കുന്നുവെന്ന പ്രത്യേകതയുമായി എത്തുന്ന രാജ്കുമാർ പെരിയസാമി ചിത്രം ‘ഒ.എം – ഓപ്പറേഷൻ മോൾ’ ട്രെയ്ലർ പുറത്തിറങ്ങി. ആക്ഷനും വൈകാരിക രംഗങ്ങളും ഉദ്വേഗജനകമായ മുഹൂർത്തങ്ങളും നിറഞ്ഞ ചിത്രത്തിന്റെ ട്രെയ്ലർ ഇതിനോടകം സിനിമാപ്രേമികൾക്കിടയിൽ ശ്രദ്ധ നേടുകയാണ്. നവംബർ 20ന് ചിത്രം ആഗോളതലത്തിൽ തിയേറ്ററുകളിലെത്തും.
കാടിന്റെ പശ്ചാത്തലത്തിൽ നടക്കുന്ന സംഘർഷങ്ങളും ചന്ദനക്കടത്തുമായി ബന്ധപ്പെട്ട സംഭവവികാസങ്ങളുമാണ് ചിത്രത്തിന്റെ പ്രധാന പ്രമേയമെന്നാണ് ട്രെയ്ലർ നൽകുന്ന സൂചന. അധികാരവും നിയമവും അതിജീവനവും തമ്മിലുള്ള പോരാട്ടങ്ങൾക്കൊപ്പം ശക്തമായ ആക്ഷൻ രംഗങ്ങളും വൈകാരിക സംഘർഷങ്ങളും ചിത്രത്തിലുണ്ടാകുമെന്നാണ് ദൃശ്യങ്ങൾ വ്യക്തമാക്കുന്നത്.
റെഡ് ഹിൽസ് കാർത്തികേയൻ എന്ന കഥാപാത്രമായാണ് മമ്മൂട്ടി ചിത്രത്തിലെത്തുന്നത്. കേന്ദ്ര കഥാപാത്രത്തെ ധനുഷ് അവതരിപ്പിക്കുമ്പോൾ ഐ.പി.എസ് ഉദ്യോഗസ്ഥ നിത്യ റെഡ്ഡിയായി സായ് പല്ലവിയും വേഷമിടുന്നു. നിയമവിരുദ്ധമായ ചന്ദനക്കടത്ത് തടയാനുള്ള നിർണായക ദൗത്യത്തിന് നേതൃത്വം നൽകുന്ന ഉദ്യോഗസ്ഥയാണ് നിത്യ. ശ്രീലീല, നസിറുദ്ദീൻ ഷാ, ഇന്ദ്രൻസ് എന്നിവരും പ്രധാന കഥാപാത്രങ്ങളായി ചിത്രത്തിലുണ്ട്.സായ് അഭ്യങ്കറാണ് ചിത്രത്തിന് സംഗീതവും പശ്ചാത്തലസംഗീതവും ഒരുക്കുന്നത്. ട്രെയ്ലറിലെ ആക്ഷൻ രംഗങ്ങൾക്കും തീവ്രമായ വൈകാരിക മുഹൂർത്തങ്ങൾക്കും സംഗീതം കൂടുതൽ കരുത്തേകുന്നുണ്ട്. നേരത്തെ പുറത്തിറങ്ങിയ ഗാനങ്ങൾക്കും മമ്മൂട്ടിയുടെ ബർമ്മ കാർത്തികേയൻ കഥാപാത്രത്തെ പരിചയപ്പെടുത്തിയ ഗ്ലിംപ്സ് വീഡിയോയ്ക്കും സായ് പല്ലവിയുടെ നിത്യ റെഡ്ഡി ക്യാരക്ടർ വീഡിയോയ്ക്കും മികച്ച പ്രതികരണമാണ് ലഭിച്ചത്.
‘അമരൻ’ എന്ന ഹിറ്റ് ചിത്രത്തിന് ശേഷം രാജ്കുമാർ പെരിയസാമി സംവിധാനം ചെയ്യുന്ന സിനിമയാണിത്. ‘മാരി 2’ന് ശേഷം ധനുഷും സായ് പല്ലവിയും വീണ്ടും ഒന്നിക്കുന്നു എന്നതും ചിത്രത്തിന്റെ പ്രത്യേകതയാണ്. തമിഴ്, തെലുങ്ക്, ഹിന്ദി ഭാഷകളിലായാണ് ചിത്രം റിലീസ് ചെയ്യുന്നത്.
ധനുഷിന്റെ വണ്ടർബാർ ഫിലിംസും ആർ ടേക്ക് സ്റ്റുഡിയോസും ചേർന്നാണ് ചിത്രം നിർമ്മിക്കുന്നത്. ശ്രദ്ധ അഗർവാൾ, ധനുഷ്, അസ്മത് ജഗ്മഗ് എന്നിവർ നിർമ്മാതാക്കളാണ്. വിഷു രാമസാമിയാണ് ക്രിയേറ്റീവ് പ്രൊഡ്യൂസർ. ശ്രേയസ് ശ്രീനിവാസനും സന്ദേശ് അഗർവാളും സഹനിർമ്മാതാക്കളാണ്.
എഴിൽ അരസനാണ് ഛായാഗ്രഹണം. ആർ കലൈവാനൻ എഡിറ്റിംഗും യാനിക് ബെൻ ആക്ഷൻ കൊറിയോഗ്രഫിയും നിർവഹിക്കുന്നു. രാജീവനാണ് പ്രൊഡക്ഷൻ ഡിസൈനർ. കേരളത്തിലെ വിതരണാവകാശം ബിനു ജോർജ് അലക്‌സാണ്ടർ പ്രൊഡക്ഷൻസ് സ്വന്തമാക്കിയപ്പോൾ ഡ്രീം ബിഗ് ഫിലിംസാണ് വിതരണ പങ്കാളികൾ. വമ്പൻ താരനിരയും സാങ്കേതിക പ്രവർത്തകരുടെ മികച്ച സംഘവും അണിനിരക്കുന്ന ‘ഒ.എം – ഓപ്പറേഷൻ മോൾ’ നവംബർ 20ന് തിയേറ്ററുകളിലെത്തുമ്പോൾ പ്രേക്ഷകർക്ക് വലിയൊരു ആക്ഷൻ സിനിമാറ്റിക് അനുഭവം സമ്മാനിക്കുമെന്നാണ് പ്രതീക്ഷ.
