തെന്നിന്ത്യൻ പ്രിയതാരങ്ങളായ വിജയ് ദേവരകൊണ്ടയും രശ്മിക മന്ദാനയും തമ്മിലുള്ള പ്രണയത്തിന്റെയും വിവാഹത്തിന്റെയും വിശേഷങ്ങൾ സിനിമാലോകത്ത് വീണ്ടും ചർച്ചയാകുന്നു. കരൺ ജോഹറിന്റെ ജനപ്രിയ ടോക്ക് ഷോയായ ‘കോഫി വിത്ത് കരണിൽ’ അതിഥികളായി എത്തിയപ്പോഴാണ് രശ്മികയെ താൻ പ്രൊപ്പോസ് ചെയ്ത രസകരമായ സാഹചര്യം വിജയ് തുറന്നുപറഞ്ഞത്.
യഥാർത്ഥത്തിൽ ഇറ്റലിയിൽ വെച്ച് രശ്മികയെ പ്രൊപ്പോസ് ചെയ്യാനായിരുന്നു താൻ ആദ്യം പ്ലാൻ ചെയ്തിരുന്നതെന്നും, എന്നാൽ ആ സമയത്ത് അതിനു പറ്റിയ മോതിരം കണ്ടെത്താൻ സാധിച്ചില്ലെന്നും താരം വെളിപ്പെടുത്തി. തുടർന്ന് വിവാഹത്തിന് തൊട്ടുമുമ്പ് ഉദയ്പൂരിൽ വെച്ച് നടന്ന സംഗീത് ചടങ്ങിനിടയിൽ സുഹൃത്തുക്കളുടെ മുന്നിൽ മുട്ടുകുത്തിയിരുന്നാണ് താരം രശ്മികയ്ക്ക് മോതിരം അണിയിച്ച് വിവാഹാഭ്യർത്ഥന നടത്തിയത്.
തങ്ങൾ തമ്മിലുള്ള വിവാഹത്തെക്കുറിച്ചുള്ള സംസാരങ്ങളും പ്രണയകാലത്തെ രസകരമായ ഓർമ്മകളും ഇരുവരും പരിപാടിയിൽ പങ്കുവെച്ചു. ‘രണബാലി’ എന്ന ചിത്രത്തിന്റെ പ്രൊമോഷന്റെ ഭാഗമായി എത്തിയ ഈ താരജോഡികളുടെ വിശേഷങ്ങൾ ഇതിനോടകം തന്നെ ആരാധകർ ഏറ്റെടുത്തു കഴിഞ്ഞു.
