തിയേറ്ററുകളിൽ പ്രതീക്ഷിച്ച രീതിയിൽ പ്രേക്ഷകരുമായി കണക്ട് ചെയ്യാതെ പോയ ‘ഓടും കുതിര ചാടും കുതിര’യെക്കുറിച്ച് തുറന്നുപറഞ്ഞ് ഫഹദ് ഫാസിൽ. സിനിമയുടെ സ്ക്രിപ്റ്റ് ഘടന ഒരുക്കുന്നതിൽ തങ്ങൾക്ക് വീഴ്ച സംഭവിച്ചുവെന്നാണ് ഫഹദ് ഫാസിൽ പറയുന്നത്. തന്റെ മാനസിക വിഷമങ്ങളും ഡിപ്രഷനും മറ്റൊരു കഥാപാത്രത്തിന്റെ അനുഭവങ്ങളിലൂടെ അവതരിപ്പിക്കാൻ ശ്രമിച്ചതാണ് ചിത്രത്തിൽ പാളിപ്പോയതെന്നും അദ്ദേഹം വ്യക്തമാക്കി. ഗലാട്ട പ്ലസിന് നൽകിയ അഭിമുഖത്തിലാണ് ഫഹദ് ചിത്രത്തെക്കുറിച്ചുള്ള തന്റെ വിലയിരുത്തൽ പങ്കുവെച്ചത്.
അബി എന്ന കഥാപാത്രത്തിന്റെ കഥയാണ് പ്രധാനമായും പറയാൻ ഉദ്ദേശിച്ചതെങ്കിലും, അത് മറ്റൊരു കഥാപാത്രത്തിന്റെ അനുഭവങ്ങളിലൂടെയാണ് അവതരിപ്പിച്ചതെന്ന് ഫഹദ് പറഞ്ഞു. തന്റെ മാനസികാവസ്ഥയും ഡിപ്രഷനും മറ്റൊരു പെൺകുട്ടിയുടെ അനുഭവങ്ങളിലൂടെ അവതരിപ്പിക്കാനുള്ള ശ്രമം വേണ്ടത്ര ഫലപ്രദമായില്ലെന്നാണ് തന്റെ വിലയിരുത്തലെന്നും അദ്ദേഹം വ്യക്തമാക്കി.
ആ കഥാപാത്രത്തിന്റെ കഥ ആദ്യം അവതരിപ്പിച്ച ശേഷം തന്റെ കഥാപാത്രത്തിന്റെ കഥയിലേക്ക് കടന്നിരുന്നെങ്കിൽ കൂടുതൽ ഫലപ്രദമായേനെ എന്ന അഭിപ്രായവും ഫഹദ് പങ്കുവെച്ചു. അതേസമയം, തനിക്ക് ഏറെ ഇഷ്ടപ്പെട്ട് ചെയ്ത സിനിമയാണ് **‘ഓടും കുതിര ചാടും കുതിര’**യെന്നും അദ്ദേഹം കൂട്ടിച്ചേർത്തു.
അൽത്താഫ് സലിം സംവിധാനം ചെയ്ത ചിത്രത്തിൽ ഫഹദ് ഫാസിലിനൊപ്പം കല്യാണി പ്രിയദർശനാണ് നായികയായത്. ധ്യാൻ ശ്രീനിവാസൻ, വിനയ് ഫോർട്ട്, ലാൽ, രൺജി പണിക്കർ, റാഫി, ജോണി ആന്റണി, സുരേഷ് കൃഷ്ണ, നന്ദു, അനുരാജ്, ഇടവേള ബാബു, ബാബു ആന്റണി, വിനീത് ചാക്യാർ, സാഫ് ബോയ്, ലക്ഷ്മി ഗോപാലസ്വാമി, ആതിര നിരഞ്ജന തുടങ്ങിയവരും ചിത്രത്തിൽ പ്രധാന വേഷങ്ങളിലെത്തി.
തിയേറ്ററിൽ സമ്മിശ്ര പ്രതികരണമാണ് ചിത്രത്തിന് ലഭിച്ചത്. എന്നാൽ ഒടിടി റിലീസിന് പിന്നാലെ സിനിമയെ പ്രശംസിച്ചുകൊണ്ടുള്ള നിരവധി പ്രതികരണങ്ങൾ സോഷ്യൽ മീഡിയയിൽ പ്രത്യക്ഷപ്പെട്ടിരുന്നു. അതേസമയം, ഫഹദ് ഫാസിൽ നായകനാകുന്ന പുതിയ ചിത്രം ‘ഡോണ്ട് ട്രബിൾ ദി ട്രബിൾ’ ഒക്ടോബർ 2ന് ആഗോളതലത്തിൽ തിയേറ്ററുകളിലെത്തും. ബാലതാരം സാറ പാലേക്കറും സൗരഭ് സച്ദേവും പ്രധാന കഥാപാത്രങ്ങളെ അവതരിപ്പിക്കുന്ന ചിത്രം ശശാങ്ക് യെലേട്ടിയാണ് സംവിധാനം ചെയ്യുന്നത്. എസ്.എസ്. രാജമൗലി അവതരിപ്പിക്കുന്ന ചിത്രം എസ്.എസ്. കാർത്തികേയ, ഷോബു യാർലഗഡ്ഡ, പ്രസാദ് ദേവിനേനി എന്നിവർ ചേർന്നാണ് നിർമ്മിക്കുന്നത്. കേരളത്തിൽ ഭാവന റിലീസാണ് ചിത്രം വിതരണം ചെയ്യുന്നത്.
