റൺവീർ സിംഗിനെ നായകനാക്കി ആദിത്യ ധർ സംവിധാനം ചെയ്യുന്ന ബ്രഹ്മാണ്ഡ ആക്ഷൻ ത്രില്ലർ ‘ധുരന്ധർ 2’ (Dhurandhar: The Revenge) റിലീസിന് തയ്യാറെടുക്കുകയാണ്. 2026 മാർച്ച് 19-ന് ചിത്രം ലോകമെമ്പാടുമുള്ള തിയേറ്ററുകളിൽ എത്താനിരിക്കെ, ആരാധകരെ ആവേശത്തിലാക്കി സിനിമയുടെ ഒടിടി പ്ലാറ്റ്ഫോമിനെക്കുറിച്ചുള്ള വിവരങ്ങളും പുറത്തുവന്നു. ചിത്രം തിയേറ്റർ റിലീസിന് ശേഷം ജിയോ ഹോട്ട്സ്റ്റാറിലൂടെ (JioHotstar) ആയിരിക്കും സ്ട്രീമിംഗ് ആരംഭിക്കുക.
ഇന്ത്യൻ ഇന്റലിജൻസ് ഏജന്റിന്റെ കഥ പറയുന്ന ഈ ചിത്രത്തിൽ റൺവീർ സിംഗ് ജസ്കിരത് സിംഗ് രംഗിയായും ഹംസയായും ഇരട്ടവേഷങ്ങളിലാണ് എത്തുന്നത്. ആദ്യ ഭാഗം ബോക്സ് ഓഫീസിൽ 1300 കോടിയിലധികം നേടി ചരിത്രവിജയമായിരുന്നു. അതിന്റെ തുടർച്ചയായ രണ്ടാം ഭാഗം മാർച്ച് 19-ന് മലയാളം ഉൾപ്പെടെയുള്ള അഞ്ച് ഭാഷകളിലായി ആഗോള റിലീസിനെത്തും. ചിത്രത്തിന്റെ ട്രെയിലറിന് ഒടുവിലാണ് സ്ട്രീമിംഗ് പാർട്ണറായി ജിയോ ഹോട്ട്സ്റ്റാറിനെ പ്രഖ്യാപിച്ചിരിക്കുന്നത്.
സിനിമയുടെ അഡ്വാൻസ് ബുക്കിംഗിലും വലിയ കുതിപ്പാണ് രേഖപ്പെടുത്തുന്നത്. പശ്ചിമേഷ്യൻ സംഘർഷങ്ങളുടെ പശ്ചാത്തലത്തിൽ നടൻ യഷിന്റെ ‘ടോക്സിക്’ (Toxic) എന്ന സിനിമയുടെ റിലീസ് മാറ്റിവെച്ചതോടെ ധുരന്ധർ 2-ന് ബോക്സ് ഓഫീസിൽ വലിയ സാധ്യതയാണ് കൽപ്പിക്കപ്പെടുന്നത്. സഞ്ജയ് ദത്ത്, ആർ. മാധവൻ, അർജുൻ രാംപാൽ തുടങ്ങിയവർ പ്രധാന വേഷങ്ങളിൽ എത്തുന്ന ചിത്രം മാർച്ച് 18-ന് തന്നെ പെയ്ഡ് പ്രിവ്യൂ ഷോകൾ ആരംഭിക്കുമെന്നും റിപ്പോർട്ടുകളുണ്ട്.
