മലയാള സിനിമാ പ്രേക്ഷകർ ഒന്നടങ്കം കാത്തിരിക്കുന്ന ‘ആട് 3’ എന്ന ചിത്രത്തിന്റെ ചിത്രീകരണം പൂർത്തിയായി. മിഥുൻ മാനുവൽ തോമസ് സംവിധാനം ചെയ്യുന്ന ഈ ബിഗ് ബജറ്റ് ചിത്രത്തിന്റെ ഷൂട്ടിംഗ് 127 ദിവസം നീണ്ടുനിന്ന കഠിനപ്രയത്നത്തിനൊടുവിലാണ് പായ്ക്കപ്പായത്. ചിത്രീകരണം പൂർത്തിയായ വിവരം അണിയറപ്രവർത്തകർ സോഷ്യൽ മീഡിയയിലൂടെ പങ്കുവെച്ചിട്ടുണ്ട്.
ഫ്രൈഡേ ഫിലിം ഹൗസും കാവ്യ ഫിലിം കമ്പനിയും സംയുക്തമായാണ് ഈ ചിത്രം നിർമ്മിക്കുന്നത്. ജയസൂര്യ അവതരിപ്പിക്കുന്ന ഷാജി പാപ്പൻ എന്ന പ്രിയ കഥാപാത്രത്തിന്റെ മൂന്നാം വരവിനായി വലിയ തയ്യാറെടുപ്പുകളാണ് നടത്തിയിട്ടുള്ളത്. വിജയ് ബാബു, വിനായകൻ, സണ്ണി വെയ്ൻ, സൈജു കുറുപ്പ്, ഇന്ദ്രൻസ് തുടങ്ങിയ വൻ താരനിര തന്നെ ചിത്രത്തിൽ അണിനിരക്കുന്നുണ്ട്.
ചിത്രത്തിന്റെ റിലീസ് തീയതിയും അണിയറപ്രവർത്തകർ പ്രഖ്യാപിച്ചു കഴിഞ്ഞു. വരാനിരിക്കുന്ന മാർച്ച് 19-ന് ചിത്രം തിയേറ്ററുകളിലെത്തും. പ്രൊഡക്ഷൻ കൺട്രോളർ ഷിബു ജി. സുശീലൻ ഉൾപ്പെടെയുള്ളവർ സിനിമയുടെ വലിയ ക്യാൻവാസിനെക്കുറിച്ചും ലൊക്കേഷനിലെ അനുഭവങ്ങളെക്കുറിച്ചും വാചാലരായി. സാങ്കേതികമായി ഏറെ മികച്ചുനിൽക്കുന്ന ഒരു വിഷ്വൽ ട്രീറ്റായിരിക്കും ആട് 3 എന്നാണ് ലഭിക്കുന്ന സൂചനകൾ.
