തെന്നിന്ത്യൻ സിനിമാ ലോകം ഒന്നടങ്കം ആഘോഷമാക്കിയ വിജയ് ദേവരകൊണ്ട-രശ്മിക മന്ദാന വിവാഹത്തിന് പിന്നാലെ, തന്റെ പുതിയ ‘ചേട്ടത്തിയമ്മയ്ക്ക്’ സ്വാഗതമോതി നടനും വിജയിയുടെ സഹോദരനുമായ ആനന്ദ് ദേവരകൊണ്ട. സോഷ്യൽ മീഡിയയിലൂടെ പങ്കുവെച്ച ഹൃദ്യമായ കുറിപ്പിലൂടെയാണ് ആനന്ദ് രശ്മികയെ ദേവരകൊണ്ട കുടുംബത്തിലേക്ക് ഔദ്യോഗികമായി സ്വീകരിച്ചത്. വർഷങ്ങളായുള്ള ആരാധകരുടെ കാത്തിരിപ്പിനും ആകാംക്ഷകൾക്കും വിരാമമിട്ടാണ് ഈ പ്രിയജോഡികൾ രാജസ്ഥാനിൽ വെച്ച് വിവാഹിതരായത്.
നേരത്തെ സോഷ്യൽ മീഡിയയിൽ ആരാധകർ നിരന്തരം ‘ചേട്ടത്തിയമ്മയ്ക്ക് സുഖമാണോ?’ എന്ന് ചോദിക്കുമ്പോൾ മറുപടി നൽകാൻ കഴിയാതെ താൻ വിഷമിച്ചിരുന്നുവെന്ന് ആനന്ദ് കുറിപ്പിൽ ഓർമ്മിച്ചു. എന്നാൽ ഇപ്പോൾ ആ രഹസ്യം പരസ്യമായെന്നും, ലോകത്തിലെ ഏറ്റവും കരുണയുള്ള ഒരു ചേട്ടത്തിയമ്മയെ തനിക്ക് ലഭിച്ചതിൽ അതിയായ സന്തോഷമുണ്ടെന്നും താരം കുറിച്ചു. രശ്മികയും വിജയ്യും ഒന്നിച്ചുള്ള വിവാഹചിത്രങ്ങൾ പങ്കുവെച്ചുകൊണ്ടായിരുന്നു ആനന്ദിന്റെ വൈകാരികമായ ഈ പ്രതികരണം.
ആന്ധ്രാ പാരമ്പര്യവും കുടക് ആചാരങ്ങളും കോർത്തിണക്കി ഉദയ്പൂരിൽ വെച്ച് നടന്ന ചടങ്ങിൽ അടുത്ത ബന്ധുക്കളും സുഹൃത്തുക്കളും മാത്രമാണ് പങ്കെടുത്തത്. ‘വിറോഷ്’ എന്ന് ആരാധകർ വിളിക്കുന്ന ഈ ജോഡികൾ തങ്ങളുടെ വിവാഹത്തിന് ‘വിറോഷ് വിവാഹം’ എന്നാണ് പേരിട്ടത്. വിവാഹശേഷം പ്രധാനമന്ത്രി നരേന്ദ്ര മോദി ഉൾപ്പെടെയുള്ള പ്രമുഖർ താരദമ്പതികൾക്ക് ആശംസകളുമായി എത്തിയിരുന്നു.
സിനിമയിലെ പ്രണയം യഥാർത്ഥ ജീവിതത്തിലേക്കും പകർത്തിയ വിജയിയുടെയും രശ്മികയുടെയും വിവാഹ വിശേഷങ്ങൾ ഇപ്പോഴും സോഷ്യൽ മീഡിയയിൽ തരംഗമാണ്. പ്രിയപ്പെട്ടവർക്കൊപ്പമുള്ള സന്തോഷനിമിഷങ്ങൾ പങ്കുവെക്കുന്നതിനൊപ്പം, തങ്ങളുടെ ജീവിതത്തിലെ പുതിയ അധ്യായത്തിന് പിന്തുണ നൽകിയ ആരാധകർക്ക് ഇരുവരും നന്ദി അറിയിക്കുകയും ചെയ്തു.
