യുവ സംവിധായകൻ മിഥുൻ മാനുവൽ തോമസിന്റെ പുതിയ ചിത്രത്തിൽ ജയറാം നായകൻ. അഞ്ചാം പാതിരാ എന്ന സൂപ്പർഹിറ്റ് ചിത്രത്തിനു ശേഷം മിഥുൻ സംവിധാനം ചെയ്യുന്ന ചിത്രമാണിത്. ‘ഏബ്രഹാം ഓസ്‌ലർ’ എന്ന് പേരിട്ടിരിക്കുന്ന സിനിമയുടെ ചിത്രീകരണം മെയ് 20ന് ആരംഭിക്കുമെന്നാണ് സംവിധായകൻ പറയുന്നത്.ഫസ്റ്റ് ലുക്ക് പോസ്റ്ററിനൊപ്പമാണ് സിനിമ പ്രഖ്യാപിച്ചത്
തൃശൂർ, കോയമ്പത്തൂർ, വയനാട് എന്നിവിടങ്ങളിലാണ് ഏബ്രഹാം ഓസ്‌ലർ സിനിമയുടെ ചിത്രീകരണം. പുറത്തെത്തിയ പോസ്റ്ററിൽ സോൾട്ട് ആൻഡ് പെപ്പർ ലുക്കിലാണ് ജയറാം.അബ്രഹാം ഓസ്‌ലറും ത്രില്ലർ വിഭാഗത്തിൽ എത്തുന്ന സിനിമയാണ്.ബിഗ് ബജറ്റുള്ള മെഡിക്കൽ ത്രില്ലർ ഗണത്തിൽപെടുന്ന ചിത്രമാണിത്. ഇർഷാദ് എം. ഹസ്സനൊപ്പം മിഥുൻ മാനുവൽ തോമസും ചേർന്നാണ് സിനിമ നിർമ്മിക്കുന്നത്.
ഡോ. രൺധീർ കൃഷ്ണൻ ആണ് സിനിമയുടെ രചന നിർവഹിക്കുന്നുത്. ഛായാഗ്രഹണം തേനി ഈശ്വർ, സംഗീതം മിഥുൻ മുകുന്ദൻ, എഡിറ്റിംഗ് സൈജു ശ്രീധരൻ, കലാസംവിധാനം ഗോകുൽ ദാസ്, എക്‌സിക്യൂട്ടീവ് പ്രൊഡ്യൂസർ ജോൺ മന്ത്രിക്കൽ, ലൈൻ പ്രൊഡ്യൂസർ സുനിൽ സിംഗ്, ക്രിയേറ്റീവ് ഡയറക്ടർ പ്രിൻസ് ജോയ്, പ്രൊഡക്ഷൻ കൺട്രോളർ പ്രശാന്ത് നാരായണൻ, മേക്കപ്പ് റോണക്‌സ് സേവ്യർ, സ്റ്റിൽസ് എസ്.ബി.കെ ഷുഹൈർ, ഡിസൈൻസ് യെല്ലോടൂത്ത്‌സ് എന്നിങ്ങനെയാണ് സിനിമയുടെ അണിയറ പ്രവർത്തകർ.