സംഗീത ഇതിഹാസം ഇളയരാജയുടെ ജീവിതത്തെ ആസ്പദമാക്കി ഒരുങ്ങുന്ന സിനിമയുടെ ഫസ്റ്റ്‌ലുക്ക് പോസ്റ്റർ പുറത്തിറങ്ങി. ധനുഷാണ് ഇളയരാജയായി എത്തുന്നത്. അരുൺ മാതേശ്വരൻ ആണ് സംവിധാനം. ചെന്നൈയിൽ നടന്ന ചടങ്ങിലാണ് ചിത്രത്തിന്റെ പോസ്റ്റർ പുറത്തിറക്കിയത്. ഇളയരാജ മുഖ്യാതിഥിയായ ചടങ്ങിൽ കമൽഹാസൻ, ധനുഷ് തുടങ്ങി ഒട്ടേറെ താരങ്ങൾ പങ്കെടുത്തു.
ശ്രീറാം ഭക്തിസാരൻ, സി.കെ പദ്മകുമാർ, വരുൺ മാതൂർ, ഇളംപരിതി ഗജേന്ദ്രൻ, സൗരഭ് മിശ്ര എന്നിവരാണ് നിർമാതാക്കൾ. ഇളയരാജ തന്നെയാണ് സംഗീത സംവിധാനം നിർവഹിക്കുന്നത്. ഇളയരാജയായി അഭിനയിക്കണമെന്ന് ആഗ്രഹിച്ച് ഉറക്കം നഷ്ടപ്പെട്ട ഒരാളാണ് താനെന്നാണ് ധനുഷ് ചടങ്ങിൽ പറഞ്ഞത്.
‘ഇളയരാജ സാറിന്റെ പാട്ടുകൾ കേട്ട് ഉറങ്ങുന്നവരാണ് നമ്മൾ. എന്നാൽ ഇളയരാജ സാറായി അഭിനയിക്കണമെന്ന് അതിയായി ആഗ്രഹിച്ച് പല രാത്രികളിലും ഉറക്കം നഷ്ടപ്പെട്ട ഒരാളാണ് ഞാൻ. രണ്ടുപേരുടെ ജീവിചരിത്രമാണ് ഞാൻ സിനിമയിൽ അവതരിപ്പിക്കണമെന്ന് ആഗ്രഹിച്ചത്. അതിലൊരാൾ ഇളയരാജ സാറായിരുന്നു. മറ്റൊരാൾ സൂപ്പർസ്റ്റാർ രജിനികാന്തും. ഒന്നുനടക്കാൻ പോകുന്നു. ഞാൻ ഇളയരാജ സാറിന്റെ ആരാധകനാണ് ഭക്തനാണ്. ഇത് എല്ലാവർക്കും അറിയാം. അഭിനയം അറിയാത്ത കാലം മുതൽ ഈ നിമിഷം വരെ അദ്ദേഹത്തിന്റെ ഈണങ്ങളായിരുന്നു വഴികാട്ടി. ഓരോ രംഗങ്ങളും എങ്ങിനെ ചെയ്യണമെന്ന് അത് എനിക്ക് പറഞ്ഞുതരും’ – ധനുഷ് പറഞ്ഞു.