അഭിനയ പ്രതിഭ കൊണ്ട് വിസ്മയിപ്പിക്കുന്ന അഭിനേതാക്കളോട് പ്രേക്ഷകർക്ക് എപ്പോഴും പ്രേക്ഷകർക്ക് പ്രത്യേക സ്നേഹമുണ്ടാകും. ബോളിവുഡ് അത്തരത്തിൽ മനം കവർന്ന താരമാണ് മനോജ് ബാജ്പേയി. മൂന്ന് പതിറ്റാണ്ട് നീളുന്ന അഭിനയജീവിതത്തിലൂടെ അദ്ദേഹം രാജ്യമാകെ ആരാധകരെ സൃഷ്ടിച്ചിട്ടുണ്ട്. അമ്പത്തിനാല് വയസായിട്ടും ഇപ്പോൾ ഫിറ്റ്നസ് കൊണ്ടും മനോജ് ബായ്പേയി അമ്പരിപ്പിക്കുന്നുണ്ട്. ഏറെക്കാലമായി താൻ പിന്തുടരുന്ന ഒരു നിഷ്ഠയെക്കുറിച്ചാണ് അദ്ദേഹം ഇപ്പോൾ തുറന്ന് പറഞ്ഞിരിക്കുന്നത്. കഴിഞ്ഞ 14 വർഷമായി താൻ അത്താഴം കഴിക്കാറില്ല എന്നുള്ള സത്യമാണ് അദ്ദേഹം വെളിപ്പെടുത്തിയത്.
ശരീരഭാരത്തിൻറെയും രോഗങ്ങളുടെയുമൊക്കെ കാര്യമെടുത്താൽ ഏറ്റവും വലിയ ശത്രു ആഹാരമാണ് എന്നാണ് അദ്ദേഹം പറയുന്നത്. ‘നിങ്ങൾ അത്താഴം ഒഴിവാക്കുന്ന പക്ഷം പല രോഗങ്ങളിൽ നിന്നും നിങ്ങളെ നിങ്ങൾക്ക് രക്ഷിക്കാനാവും. ഭക്ഷണം ഇഷ്ടപ്പെടുന്നതുകൊണ്ടാണ് ഭക്ഷണം കുറച്ചത്. അത് എന്തുകൊണ്ടാണെന്ന് നിങ്ങൾ അത്ഭുതപ്പെടും. കാരണം അത്ര നല്ല ഭക്ഷണമാണ് ഉച്ചയ്ക്ക് കഴിക്കുന്നത്’ – മനോജ് ബാജ്പേയി പറഞ്ഞു.
‘ചോറും റൊട്ടിയും, എൻറെ പ്രിയപ്പെട്ട വെജിറ്റേറിയനോ നോൺ വെജിറ്റേറിയനോ ആയ കൂട്ടാനും അതിനൊപ്പം ഉണ്ടാവും. ശരീരഭാരം നിയന്ത്രിച്ച് നിർത്താൻ ഈ ശീലം കൊണ്ട് തനിക്ക് സാധിക്കുന്നുണ്ട്’ – അദ്ദേഹം പറഞ്ഞു. വ്യായാമത്തിനുള്ള പ്രാധാന്യത്തക്കുറിച്ചും അദ്ദേഹം ഊന്നിപ്പറയുന്നുണ്ട്. “യോഗയും മെഡിറ്റേഷനും ചെയ്യുന്നുണ്ട്. ഒതുങ്ങിയ വയറിൽ മാത്രമല്ല കാര്യം, നിങ്ങളുടെ മാനസികാരോഗ്യവും വളരെ പ്രധാനമാണ്. ശരീരത്തിൻറെ രൂപഘടനയ്ക്കായല്ല ഇതൊക്കെ ചെയ്യുന്നത്. ഒതുങ്ങിയ വയർ വേണമെന്ന് തീരുമാനിച്ചാൽ അത് നേടും. പക്ഷേ അതല്ല എനിക്ക് വേണ്ടത്. കാരണം എനിക്ക് എല്ലാ തരം സിനിമകളും സിരീസുകളും ചെയ്യണം. ശരീരം ഒരു പ്രത്യേക ഷേപ്പിൽ ആക്കിയാൽ എല്ലാ റോളുകളും ചെയ്യാനാവില്ല”, മനോജ് ബാജ്പേയി കൂട്ടിച്ചേർത്തു.