ആദ്യത്തെ കണ്‍മണിയെ കാത്തിരിക്കുകയാണ് ബോളിവുഡ് താര ദമ്പതികളായ രണ്‍വീര്‍ സിങ്ങും ദീപിക പദുക്കോണും. അടുത്തിടെയാണ് അമ്മയാകാനൊരുങ്ങുന്ന സന്തോഷം താരങ്ങള്‍ പങ്കുവച്ചത്. സെപ്റ്റംബറില്‍ കുഞ്ഞിന് ജന്മം നല്‍കുമെന്നായിരുന്നു ഇരുവരും പങ്കുവച്ചിരുന്നത്.
ഇപ്പോഴിതാ പ്രസവത്തിന് തയ്യാറെടുക്കുന്ന ദീപികയ്ക്കായി രണ്‍വീര്‍ സിങ് ആറുമാസം പിതൃത്വ അവധി എടുക്കുന്നെന്ന വാര്‍ത്തയാണ് ശ്രദ്ധേയമാകുന്നത്. ഈ കാലയളവില്‍ പുതിയ സിനിമകളൊന്നും താരം ഏറ്റെടുക്കില്ല.
ദീപിക ഏറ്റെടുത്ത പ്രോജക്ടുകള്‍ എല്ലാം തന്നെ പൂര്‍ത്തിയാക്കി കഴിഞ്ഞു. എല്ലാ ജോലികളും തീര്‍ത്ത് കുഞ്ഞതിഥിയെ വരവേല്‍ക്കാന്‍ കാത്തിരിക്കുകയാണ് ദീപികയും രണ്‍വീറും. ‘ഡോണ്‍ 3’, ‘ശക്തിമാന്‍’, ആദിത്യയുടെ ആക്ഷന്‍ ചിത്രം എന്നിവ പൂര്‍ത്തിയാക്കി ക്കഴിഞ്ഞാല്‍ പുതിയ പ്രോജക്ടുകള്‍ ഒന്നും ഏറ്റെടുക്കാതെ ദീപികയ്ക്കും കുഞ്ഞിനുമൊപ്പം സമയം ചെലവഴിക്കാനാണ് താരത്തിന്റെ തീരുമാനമെന്നാണ് റിപ്പോര്‍ട്ടുകള്‍.
രോഹിത് ഷെട്ടിയുടെ സിങ്കം എഗെയ്ന്‍ ആണ് രണ്‍വീറിന്റേതായി റിലീസിനൊരുങ്ങുന്ന ആദ്യ ചിത്രം. അക്ഷയ് കുമാര്‍, ടൈഗര്‍ ഷ്‌റോഫ്, കരീന കപൂര്‍ എന്നിവരാണ് ചിത്രത്തിലെ പ്രധാന താരങ്ങള്‍. 2018 നവംബര്‍ 14-ന് ഇറ്റലിയില്‍ വച്ചായിരുന്നു രണ്‍വീറും ദീപികയും വിവാഹിതരായത്. 2013-ല്‍ റിലീസ് ചെയ്ത ഗോലിയോം കി രാസ്ലീല രാംലീല എന്ന ചിത്രത്തിന്റെ ഷൂട്ടിങ്ങിനിടെയാണ് ഇരുവരും അടുപ്പത്തിലായത്.