ചെറുതും വലുതുമായ ഒരുപാട് കഥാപാത്രങ്ങളിലൂടെ വില്ലനായും സഹനടനായും ഹാസ്യ നടനായും പ്രേക്ഷകര്ക്ക് മുന്നില് എത്തിയ താരമാണ് സൈജു കുറുപ്പ്. 2005 ല് പുറത്തിറങ്ങിയ മയൂഖം എന്ന ചിത്രത്തിലൂടെ വെള്ളിത്തിരയിലെത്തിയ സൈജു കുറുപ്പ്, ഒരുപാട് കഷ്ടപ്പെട്ടാണ് ഒരു നടന് എന്ന നിലയിലേക്ക് എത്തിപ്പെട്ടത്. സിനിമ എന്ന തന്റെ ആഗ്രഹത്തിന് വേണ്ടി ഒരുപാട് അലഞ്ഞ സമയത്ത് പലരം മാനസിക സംഘര്ഷങ്ങളിലൂടെയും താരം കടന്നു പോയിട്ടുണ്ട്.
അപ്പോഴെല്ലാം തനിക്ക് പിന്തുണ നല്കിയത് തന്റെ കുടുംബമാണെന്ന് താരം പല അഭിമുഖങ്ങളിലും പറഞ്ഞിട്ടുണ്ട്. ഇപ്പോഴിതാ സൈജു കുറുപ്പിനെ കേന്ദ്ര കഥാപാത്രമാക്കി അരുണ് വൈഗ സംവിധാനം ചെയ്ത ഉപചാരപൂര്വ്വം ഗുണ്ട ജയന് എന്ന സിനിമ റിലീസ് ആയിരിക്കുകയാണ്. ദുല്ഖര് സല്മാനാണ് ചിത്രം നിര്മ്മിച്ചിരിക്കുന്നത്. സൈജുവിന്റെ കരിയറിലെ നൂറാമത്തെ ചിത്രമാണ് ഉപചാരപൂര്വം ഗുണ്ടജയന്. തന്റെ നൂറാമത്തെ ചിത്രം നടന് ദുല്ഖര് നിര്മിച്ചതിന്റെ സന്തോഷവും സൈജുവിനുണ്ട്. തന്റെ അഭിനയത്തെ കുറിച്ച് താരം തന്നെ പറഞ്ഞ വാക്കുകളിലേക്ക്…
വിരലിലെണ്ണാവുന്ന ചിത്രങ്ങളിലേ ഞാന് വില്ലന് വേഷം അവതരിപ്പിച്ചിട്ടുള്ളൂ. വില്ലന് വേഷം ചെയ്തിരുന്ന ആള് പിന്നീട് ഹാസ്യവേഷം അവതരിപ്പിക്കുന്ന പോലെയല്ല എന്റെ കാര്യത്തില് സംഭവിച്ചത്. ചിലപ്പോള് ഹ്യൂമര് എന്റെ കണ്ണുകളിലോ ഞാന് സംഭാഷണം അവതരിപ്പിക്കുന്നതിലോ ഉണ്ടായിരുന്നിരിക്കും. കണ്ണുകൊണ്ട് നിങ്ങളെ ചിരിപ്പിക്കുന്നത് ബോധപൂര്വമല്ല, സംഭവിച്ച് പോവുന്നതാണ്. അല്ലാതെ കണ്ണ് വച്ച് കോമഡി കാണിക്കണം എന്ന് ഞാന് കരുതിയിട്ടില്ല.
കണ്ണ് നല്ല വലുതായത് കാരണം കണ്ണിന്റെ ചലനങ്ങളും ചേഷ്ഠകളുമെല്ലാം ആളുകള്ക്ക് നന്നായി കാണാനാകും. അതുകൊണ്ട് തന്നെ ക്ലോസപ്പ് ഷോട്ടൊക്കെ ചെയ്യുമ്പോള് ആളുകള്ക്ക് തോന്നുന്നതാണ് ഞാന് കണ്ണുകൊണ്ട് അഭിനയിക്കുന്നതാണെന്ന്, സൈജു പറയുന്നു. ട്രിവാന്ഡ്രം ലോഡ്ജിന് മുമ്പുള്ള ഇരുപത്തിയെട്ട് ചിത്രങ്ങളിലെ അനുഭവം വച്ച് എനിക്ക് ഹ്യൂമര് ചെയ്യാന് പറ്റുന്നതുമായിരുന്നിരിക്കും. പിന്നെ പലരും പറഞ്ഞ് കേട്ടിട്ടുള്ളത് തന്നെയാണ് ഈ കണ്ണിന്റെ കാര്യം. അത് ദൈവാനുഗ്രഹമാണ്… സൈജു കുറുപ്പ് പറയുന്നു…