സാമന്തയും ദേവ് മോഹനും കേന്ദ്ര കഥാപാത്രങ്ങളായി എത്തിയ ചിത്രമാണ് ‘ശാകുന്തളം’. വലിയ പ്രതീക്ഷയോടെ തിയ്യേറ്ററിലെത്തിയ ചിത്രത്തിന് പക്ഷേ ബോക്‌സോഫീസില്‍ കനത്ത പരാജയമാണ് നേരിടേണ്ടി വന്നത്. തെന്നിന്ത്യയിലെ സൂപ്പര്‍ നായികയായ സാമന്തയ്ക്ക് കരിയറിലെ ഏറ്റവും വലിയ പരാജയമാണ് നേരിടേണ്ടി വന്നത്.
ചിത്രത്തിന്റെ പേരില്‍ സാമന്തയ്ക്കും രൂക്ഷ വിമര്‍ശനമാണ് നേരിടേണ്ടി വന്നത്. 65 കോടിയിലേറെ ബജറ്റില്‍ പുറത്തിറങ്ങിയ ചിത്രത്തിന് മുതല്‍ മുടക്ക് പോലും തിരിച്ചുപിടിക്കാന്‍ കഴിഞ്ഞിട്ടില്ല. തന്റെ 25 വര്‍ഷത്തെ സിനിമാ ജീവിതത്തിലെ ഏറ്റവും വലിയ നഷ്ടമാണ് ശാകുന്തളമെന്നാണ് ചിത്രത്തിന്റെ നിര്‍മ്മാതാവായ ദില്‍ രാജു പറയുന്നത്. ശാകുന്തളത്തിന് 22 കോടിയാണ് നഷ്ടമായതെന്ന് നിര്‍മ്മാതാവ് പറയുന്നു.
ചിത്രത്തിന്റെ കനത്ത പരാജയത്തെ കുറിച്ച് ദില്‍ രാജു പറയുന്നതിങ്ങനെ, 2017ലായിരുന്നു കരിയറിലെ മികച്ച വര്‍ഷം. അന്‍പത് സിനിമകള്‍ നിര്‍മ്മിച്ചവയില്‍ നാലോ അഞ്ചോ സിനിമകള്‍ മാത്രമാണ് പരാജയമായത്.
അതില്‍ ശാകുന്തളത്തിന്റെ പരാജയം പോലെ മറ്റൊരു സിനിമയ്ക്കും സംഭവിച്ചിട്ടില്ല. റിലീസ് ചെയ്ത് ആദ്യ ദിവസം തന്നെ സിനിമയുടെ പരാജയം ഉറപ്പിച്ചുകൊണ്ടായിരുന്നു കളക്ഷന്‍ റിപ്പോര്‍ട്ടുകള്‍ വന്നത്.
തെലുങ്കിനു പുറമേ, ഹിന്ദി, മലയാളം, തമിഴ്, കന്നഡ എന്നീ ഭാഷകളിലാണ് ചിത്രം റിലീസ് ചെയ്തിരുന്നു. സാമന്തയുടെ കരിയറിലെ ഏറ്റവും മോശം സിനിമയായി ശാകുന്തളം.