ഇളയദളപതി വിജയിയുടെ അമ്പതാം ജന്മദിനാഘോഷം ആഘോഷമാക്കാനുള്ള കാത്തിരിപ്പിലായിരുന്നു ആരാധക ലോകം. എന്നാല് ഇത്തവണത്തെ ആഘോഷപരിപാടികള് ഒഴിവാക്കിയിരിക്കുകയാണ് താരം. തമിഴ്നാട് കള്ളക്കുറിച്ചിയിലെ മദ്യദുരന്തത്തില് 49 പേര്ക്ക് ജീവന് നഷ്ടമായ ദാരുണ സംഭവത്തോടെയാണ് വിജയ് ആഘോഷങ്ങളില്ലെന്ന് അറിയിച്ചത്. ആരാധകരോട് ആഘോഷങ്ങള് വേണ്ടെന്നും ദുരന്തത്തില് ഇരകളായവരുടെ കുടുംബത്തിനെ സഹായിക്കാനും വിജയ് പറഞ്ഞു.
ജൂണ് 22നാണ് വിജയിയുടെ ജന്മദിനം. തമിഴ്നാട്ടിലും കേരളത്തിലും ജന്മദിനം ആഘോഷിക്കാനായി വലിയ ഒരുക്കങ്ങളാണ് ആരാധകര് നടത്തിയിരുന്നത്. വിജയ് മക്കള് ഇഴക്കം പ്രസിഡന്റ് ബുസി ആനന്ദ് ആണ് ജന്മദിനാഘോഷങ്ങള് റദ്ദാക്കിയതായി ഔദ്യോഗികമായി അറിയിച്ചു.
കഴിഞ്ഞ ദിവസം മദ്യദുരന്തത്തില് ഇരകളായവരുടെ കുടുംബാംഗങ്ങളെയും ആശുപത്രിയില് ചികിത്സയില് കഴിയുന്നവരെയും വിജയ് നേരിട്ട് കാണാനെത്തിയിരുന്നു. ചികിത്സയില് കഴിയുന്ന ഓരോരുത്തരുടെയും അടുത്തെത്തി അവരുടെ ആരോഗ്യത്തെക്കുറിച്ച് അന്വേഷിക്കുകയും കുടുംബാംഗങ്ങളെ ആശ്വസിപ്പിച്ചുമാണ് അദ്ദേഹം മടങ്ങിയത്.
കഴിഞ്ഞ ദിവസമാണ് കള്ളക്കുറിച്ചിയില് വ്യാജ മദ്യം കഴിച്ച് 49 പേര്ക്ക് ജീവന് നഷ്ടമായത്. നിലവില് നൂറോളം പേര് വിവിധ ആശുപത്രികളില് ചികിത്സയിലാണ്. കരുണപുരത്തുനിന്ന് മദ്യം കഴിച്ചവര്ക്ക് ബുധനാഴ്ച രാത്രിയോടെയാണ് തലവേദന, ഛര്ദി, തലകറക്കം, വയറുവേദന തുടങ്ങിയ അസ്വസ്ഥതകള് കണ്ടുതുടങ്ങിയത്. പിന്നാലെ തന്നെ കള്ളക്കുറിച്ചി സര്ക്കാര് മെഡിക്കല് കോളജ്, പുതുച്ചേരിയിലെ ജവഹര്ലാല് ഇന്സ്റ്റിറ്റ്യൂട്ട് ഓഫ് പോസ്റ്റ് ഗ്രാജ്വേറ്റ് മെഡിക്കല് എജ്യുക്കേഷന് ആന്ഡ് റിസര്ച്ച് (ജിപ്മര്), സേലത്തെയും വില്ലുപുരത്തെയും മറ്റ് ആശുപത്രികള് എന്നിവിടങ്ങളില് പ്രവേശിപ്പിക്കുകയും മരണം സംഭവിക്കുകയും ചെയ്യുകയായിരുന്നു.
