1990 ൽ പുറത്തിറങ്ങിയ ‘പൊന്നരഞ്ഞാണം’ എന്ന സിനിമയിൽ അഭിനയിച്ചത് തെറ്റായിപ്പോയെന്ന് പറയുകയാണ് നടി ഉഷ, ഒരു ഓൺലൈൻ ചാനലിന് നൽകിയ അഭിമുഖത്തിലാണ് ഈ കാര്യം വെളിപ്പെടുത്തുന്നത്. ഈ സിനിമയിൽ അഭിനയിച്ചത് വളരെ തെറ്റായി പോയി. പൊന്നരഞ്ഞാണം എന്ന സിനിമയെക്കുറിച്ച് ഓൺലൈൻ മീഡിയയിൽ വരുന്ന കമന്റുകൾ വായിച്ചപ്പോൾ ശരിക്കും തനിക്ക് സങ്കടം തോന്നി. ആ സിനിമയിൽ തങ്ങൾ പറ്റിക്കപ്പെട്ടതാണ്. സിനിമ സംവിധാനം ചെയ്തത് അനിൽ ബാബുവിലെ ബാബുവേട്ടനാണ്. അദ്ദേഹത്തിന്റെ രണ്ടാമത്തെ സിനിമയാണത്. രണ്ട് പെൺകുട്ടികൾ ഉളള ഒരു സ്റ്റാൻഡേർഡ് ആയ സിനിമയാണ് ചെയ്യുന്നതെന്ന് അവർ പറഞ്ഞു
ആ പ്രായത്തിൽ തനിക്ക് ലെസ്ബിയൻസ് എന്താണെന്ന് അറിയില്ല. നമ്മൾ നോക്കുമ്പോൾ നല്ല സിനിമ. പൊന്നരഞ്ഞാണം എന്നാണ് പേര്. അരഞ്ഞാണം രണ്ട് പ്രാവശ്യം അരയിൽ കെട്ടണം എന്ന് പറഞ്ഞു. തറവാട്ട് വകയിൽ കിട്ടുന്ന അരഞ്ഞാണമാണ് അത് . ലൊക്കേഷനിൽ ചെന്നപ്പോൾ തന്നെക്കൂടാതെ നിക്കറിട്ട കുറേ പെൺപിള്ളേർ നിൽക്കുന്നു. എന്താണ് വാപ്പീ ഇങ്ങനെ എന്ന് താൻ ചോദിച്ചു.നമ്മൾ കഥ ചോദിച്ചപ്പോൾ അവരിൽ പെട്ട് പോകുന്ന നാടൻ പെൺകുട്ടിയാണ് താനെന്ന് പറഞ്ഞു. ഇന്നസെന്റ് ചേട്ടന്റെ മോളായിട്ടാണ് ചിത്രത്തിൽ അഭിനയിക്കുന്നത്. മാമുക്കോയ, ഗണേശേട്ടൻ, ബൈജു, മഹേഷേട്ടൻ എന്നിവരും കൂടെ അഭിനയിക്കുന്നുണ്ട്
അവസാനം താൻ ആ ലൊക്കേഷനിൽ നിന്നും ഉടക്കിയാണ് വന്നത്, താനും മഹേഷേട്ടനും തമ്മിൽ ലൈംഗിക ബന്ധമുണ്ടായി എന്ന് കാണിക്കാൻ വേണ്ടി തങ്ങൾ കെട്ടിപ്പുണർന്ന് കിടക്കണമെന്ന് പറഞ്ഞു. താൻ അത് ചെയ്തില്ല. പറ്റില്ലെന്ന് പറഞ്ഞ് അവിടെ നിന്നും തിരിച്ച് വന്നു. തന്റെ ബാപ്പ പൊലീസിലാണ്. പൊന്നരഞ്ഞാണത്തിന് പൊലീസ് കാവൽ എന്ന് അന്നത്തെ കാലത്ത് ഗോസിപ്പ് വാർത്തകൾ വന്നു, റിലീസായപ്പോൾ എ സർട്ടിഫിക്കറ്റാണ് ചിത്രത്തിന് കിട്ടിയത്. അത് നമ്മളെ വല്ലാതെ ബാധിക്കും. തനിക്കാ സിനിമയുടെ പേര് കേൾക്കുന്നതേ അലർജിയാണ്. ഫാൻസ് ക്ലബ് ആ പടത്തിന്റെ ക്ലിപ്പിംഗ് ഇടുമ്പോൾ പോലും തനിക്ക് ദേഷ്യം തോന്നും. പലപ്പോഴും തനിക്ക് വിഷമം തോന്നിയിട്ടുണ്ട്. ആ സിനിമയിൽ അഭിനയിക്കേണ്ടിയിരുന്നില്ല. ഇപ്പോഴും ആ പ്രൊഡ്യൂസറെ കണ്ടാൽ പോലും ദേഷ്യത്തോടെയാണ് താൻ സംസാരിക്കാറെന്നും ഉഷ പറയുന്നു
