തെന്നിന്ത്യൻ സിനിമയുടെ പ്രിയതാരം മീന തൻ്റെ ജീവിതത്തിലെ ഏറ്റവും വലിയ ദുരന്തമായ ഭർത്താവ് വിദ്യാസാഗറിൻ്റെ വിയോഗത്തെക്കുറിച്ച് തുറന്നു സംസാരിച്ചു. ശ്വാസകോശത്തിലെ അണുബാധയെത്തുടർന്ന് ചികിത്സയിലിരിക്കെയാണ് വിദ്യാസാഗർ മരണപ്പെട്ടത്. ഭർത്താവിൻ്റെ വേർപാട് തൻ്റെ ജീവിതത്തിൽ ഉണ്ടാക്കിയ മാറ്റങ്ങളെക്കുറിച്ചും സ്നേഹബന്ധങ്ങളെ ഭയക്കുന്നതിനെക്കുറിച്ചും മീന ഒരു അഭിമുഖത്തിൽ മനസ് തുറന്നു.
പ്രതീക്ഷകൾ തകർന്നപ്പോൾ
വിദ്യാസാഗറിൻ്റെ രോഗം ഭേദമാകുമെന്നും ജീവിതത്തിലേക്ക് തിരികെ വരുമെന്നുമുള്ള ഉറച്ച പ്രതീക്ഷയിലായിരുന്നു താനും കുടുംബവുമെന്ന് മീന പറഞ്ഞു. “തുടക്കത്തിൽ ഡോക്ടർമാർ പോലും അങ്ങനെയാണ് കരുതിയത്. എന്നാൽ, ട്രാൻസ്പ്ലാൻ്റേഷനായി ആരോഗ്യമുള്ള ശ്വാസകോശം ലഭിക്കാഞ്ഞതാണ് തിരിച്ചടിയായത്. അതുവരെ സാഗറും ശക്തമായി പൊരുതുകയായിരുന്നു. എല്ലാ കോണുകളിൽ നിന്നും പ്രതീക്ഷ നൽകിയിട്ടും ഇത് സംഭവിച്ചത് വലിയൊരു ആഘാതമായിരുന്നു,” മീന ഓർമ്മിച്ചു.
സ്നേഹത്തെ ഭയക്കുന്നു
മരണം ഒരു പുതുമയുള്ള കാര്യമല്ലെങ്കിലും, സ്വന്തം ജീവിതത്തിൽ അത് സംഭവിക്കുമ്പോൾ ഉണ്ടാകുന്ന വേദന വളരെ വലുതാണ്. പെട്ടെന്ന് ഒരാൾ ഇല്ലാതാകുന്നത് താങ്ങാൻ കഴിയുന്നില്ലെന്നും നടി പറയുന്നു. ഭർത്താവിൻ്റെ വിയോഗത്തിന് ശേഷം താൻ ഒരാളെ സ്നേഹിക്കുന്നതിലും അടുപ്പം കാണിക്കുന്നതിലും പോലും ശ്രദ്ധാലുവാണ്.
“ഒരുപാട് സ്നേഹം നൽകാൻ ഞാൻ ഇപ്പോൾ മടിക്കുന്നു. കാരണം, ആ സ്നേഹം എന്നെ വീണ്ടും വല്ലാതെ വേദനിപ്പിച്ചേക്കുമെന്ന് ഞാൻ ഭയക്കുന്നു. എൻ്റെ മകളോട് പോലും ചിലപ്പോൾ ഞാൻ ഇങ്ങനെയാണ് പെരുമാറുന്നത്. പഴയതുപോലെ അന്ധമായി സ്നേഹിക്കാൻ ഇപ്പോൾ കഴിയുന്നില്ല. പറയാൻ ആഗ്രഹിക്കുന്ന കാര്യങ്ങൾ പോലും നൂറു ശതമാനം തുറന്നു പറയാൻ എനിക്കിപ്പോൾ ഭയമാണ്,” മീന വികാരാധീനയായി.
യാത്രകളും സിനിമയിലെ തിരക്കുകളുമാണ് തന്നെ ഈ അവസ്ഥയിൽ നിന്ന് കരകയറാൻ സഹായിക്കുന്നതെന്നും മീന കൂട്ടിച്ചേർത്തു. മോഹൻലാൽ ചിത്രമായ ‘ദൃശ്യം 3’ ഉൾപ്പെടെ നിരവധി സിനിമകളിലൂടെ മീന ഇപ്പോഴും അഭിനയരംഗത്ത് സജീവമാണ്. മകൾ നൈനികയാണ് മീനയുടെ ഇപ്പോഴത്തെ ലോകം.
