കഥ, തിരക്കഥ, സംഭാഷണം, സംവിധാനം, അഭിനയം എന്നിങ്ങനെ സിനിമയുടെ സമസ്ത മേഖലകളിലും സ്വന്തം പേര് തൻമയത്വത്തോടെ എഴുതിച്ചേർത്ത ചലച്ചിത്രകാരൻ ബാലചന്ദ്രമേനോൻ സിനിമാ ജീവിതത്തിൻ്റെ 51-ാം വാർഷികത്തിൻ്റെ നിറവിൽ. കഴിഞ്ഞ അഞ്ച് പതിറ്റാണ്ടിലേറെയായി മലയാള സിനിമയുടെ യാത്രയിൽ അദ്ദേഹം വഹിച്ച പങ്ക് വളരെ വലുതാണ്.
മാധ്യമപ്രവർത്തകനായി തുടക്കം
സംവിധായകനാകുക എന്ന സ്വപ്നം മനസ്സിലിട്ട്, അതിലേക്കുള്ള വഴിയായിട്ടാണ് ബാലചന്ദ്രമേനോൻ മാധ്യമപ്രവർത്തന രംഗത്തേക്ക് എത്തുന്നത്. യൂണിവേഴ്സിറ്റി കോളേജിലെ ബിരുദ പഠനത്തിനു ശേഷം പ്രസ് ക്ലബ്ബിന്റെ ജേണലിസം കോഴ്സ് റാങ്കോടെ പാസായ അദ്ദേഹം, ‘നാന’ എന്ന സിനിമാ വാരികയുടെ മദ്രാസ് ലേഖകനായിട്ടാണ് സിനിമാ ലോകത്ത് തൻ്റെ കരിയർ ആരംഭിച്ചത്. നടൻ മധു അടക്കമുള്ള പ്രമുഖ താരങ്ങളുമായി അഭിമുഖം നടത്തിയത് ശ്രദ്ധേയമായിരുന്നു.
അപ്രതീക്ഷിത അരങ്ങേറ്റം
1978-ൽ പുറത്തിറങ്ങിയ ‘ഉത്രാടരാത്രി’ എന്ന ചിത്രത്തിലൂടെയാണ് ബാലചന്ദ്രമേനോൻ എന്ന സംവിധായകനെ പ്രേക്ഷകർ കൂടുതൽ അറിഞ്ഞുതുടങ്ങിയത്. എന്നാൽ, അതിനും നാല് വർഷം മുൻപ്, 1974-ൽ സുബൈർ സംവിധാനം ചെയ്ത ‘കാമിനി’ എന്ന സിനിമയിൽ അദ്ദേഹം അഭിനയിച്ചിട്ടുണ്ട്. സിനിമയുടെ വിവിധ മേഖലകളിൽ താൻ കൈവെക്കാൻ പോകുന്നു എന്നതിൻ്റെ സൂചനയായിരുന്നു ഈ ആദ്യ കാൽവെപ്പ്.
വിവിധ റോളുകളിലെ പ്രതിഭ
‘ഒരു പൈങ്കിളി കഥ’ എന്ന സിനിമയിലൂടെ നിർമ്മാതാവായ ബാലചന്ദ്രമേനോൻ, ‘വിവാഹിതരെ ഇതിലെ’ എന്ന ചിത്രത്തിലൂടെ വിതരണക്കമ്പനിക്കും തുടക്കമിട്ടു. ‘അച്ചുവേട്ടന്റെ വീട്’ എന്ന ചിത്രത്തിലൂടെ എഡിറ്റിംഗും ‘കുറുപ്പിന്റെ കണക്കുപുസ്തകത്തിലൂടെ’ സംഗീതസംവിധാനവും അദ്ദേഹം നിർവ്വഹിച്ചു. സ്വന്തമായി കഥാപാത്രത്തെ സൃഷ്ടിച്ച്, സംവിധാനം ചെയ്ത് അഭിനയിച്ച ‘സമാന്തരങ്ങൾ’ എന്ന സിനിമയിലെ സ്റ്റേഷൻ മാസ്റ്റർ ഇസ്മായീൽ എന്ന കഥാപാത്രത്തിന് ‘ഭരത്’ അവാർഡ് നേടാൻ അദ്ദേഹത്തിന് കഴിഞ്ഞു.
ഇതിനിടയിൽ ലാൽ ജോസ്, സത്യൻ അന്തിക്കാട്, കമൽ തുടങ്ങിയ പ്രമുഖ സംവിധായകരുടെ സിനിമകളിലും അദ്ദേഹം ശ്രദ്ധേയമായ വേഷങ്ങൾ കൈകാര്യം ചെയ്തു. ശോഭന, കാർത്തിക, പാർവതി, ആനി, നന്ദിനി തുടങ്ങിയ നിരവധി നായികമാരെ മലയാളത്തിന് സമ്മാനിച്ചതിലും, മണിയൻപിള്ള രാജുവിനെ നായകനാക്കിയതിലും അദ്ദേഹത്തിന് വലിയ പങ്കുണ്ട്.
സിനിമയുടെ എല്ലാ മേഖലകളിലും തൻ്റെ കയ്യൊപ്പ് പതിപ്പിച്ച ബാലചന്ദ്രമേനോൻ ബി. ഉണ്ണികൃഷ്ണൻ സംവിധാനം ചെയ്യുന്ന പുതിയ ചിത്രത്തിൽ ഒരു രാഷ്ട്രീയക്കാരൻ്റെ വേഷത്തിൽ സജീവമാണ്. സുഹൃത്തുക്കളുടെ നേതൃത്വത്തിൽ തിരുവനന്തപുരത്ത് അദ്ദേഹത്തിൻ്റെ സിനിമാ ജീവിതത്തിലെ 50-ാം വാർഷികത്തിന് ഗംഭീരമായ ആഘോഷമൊരുക്കുന്നുണ്ട്.
