കൊച്ചി: മലയാളത്തിൻ്റെ നിത്യഹരിത നായിക നദിയ മൊയ്തു, തൻ്റെ കരിയറിലെയും വ്യക്തിജീവിതത്തിലെയും കൗതുകകരമായ കാര്യങ്ങൾ പങ്കുവെച്ച് രംഗത്ത്. മലയാള മനോരമയുടെ ‘ഹോർത്തൂസ് 2025’ പരിപാടിയിൽ ‘Grace and Grit: The timeless world of Nadia Moidu’ എന്ന വിഷയത്തിൽ സംസാരിക്കുകയായിരുന്നു അവർ.
ഗേളിയോടുള്ള സ്നേഹം
തൻ്റെ സിനിമാ ജീവിതത്തിൽ ഏറ്റവും പ്രിയപ്പെട്ട കഥാപാത്രമായ ‘നോക്കെത്താ ദൂരത്ത് കണ്ണുംനട്ട്’ എന്ന സിനിമയിലെ ‘ഗേളി’യെക്കുറിച്ചുള്ള ചോദ്യത്തിന് നദിയ മൊയ്തുവിൻ്റെ മറുപടി ഇങ്ങനെ: “ആ സിനിമയ്ക്ക് ഒരു രണ്ടാം ഭാഗം വന്നാൽ, തീർച്ചയായും ഞാൻ ആ പഴയ ഗേളിയായി തന്നെ അഭിനയിക്കും. വർഷങ്ങൾ എത്ര കഴിഞ്ഞാലും മലയാളികൾ ആ കഥാപാത്രത്തെയും എന്നെയും സ്നേഹിക്കുന്നു എന്നറിയുന്നത് വലിയ സന്തോഷമാണ്.”
സിനിമ വിട്ടതിൻ്റെ കാരണം
സിനിമയിൽ സജീവമായി നിൽക്കുന്ന സമയത്ത് വിവാഹിതയായതിനെക്കുറിച്ചും അഭിനയരംഗത്തുനിന്ന് പെട്ടെന്ന് വിട്ടുനിന്നതിനെക്കുറിച്ചുമുള്ള ചോദ്യങ്ങൾക്ക് അവർ മറുപടി നൽകി. “എല്ലാം അതിൻ്റേതായ സമയത്ത് നടക്കണം എന്ന ചിന്താഗതിയായിരുന്നു അന്ന്. അധികകാലം സിനിമയിൽ തുടരണമെന്ന് ഞാൻ ആഗ്രഹിച്ചിരുന്നില്ല. വിവാഹം കഴിച്ച് സെറ്റിൽ ചെയ്യാനായിരുന്നു പ്ലാൻ. അത് എൻ്റെ മാത്രം തീരുമാനമായിരുന്നു. എല്ലാം ചെറുപ്പത്തിൻ്റെ ഗുണമാണ്,” നദിയ മൊയ്തു പറഞ്ഞു.
കുടുംബവും ജോലിയും
ഒരു അമ്മയ്ക്ക് ജോലിയും കുടുംബജീവിതവും ഒരുമിച്ച് കൊണ്ടുപോവുക എന്നത് ബുദ്ധിമുട്ടുള്ള കാര്യമാണ്. എന്നാൽ എല്ലാ കാര്യത്തിലും താങ്ങും തണലുമായി നിൽക്കാൻ ആളുകളുണ്ടെങ്കിൽ നമുക്ക് എന്തും ചെയ്യാനാകും എന്നും അവർ അഭിപ്രായപ്പെട്ടു. സുഹാസിനി, മേനക, സുമലത തുടങ്ങിയ സുഹൃത്തുക്കളോടൊപ്പം കൂടുമ്പോൾ സിനിമയേക്കാൾ കൂടുതൽ വ്യക്തിപരമായ കാര്യങ്ങളെക്കുറിച്ചാണ് സംസാരിക്കുന്നതെന്നും നദിയ മൊയ്തു കൂട്ടിച്ചേർത്തു.
പുരസ്കാരങ്ങൾ ഒരു വിഷയമല്ല
ഇത്രയും വർഷത്തെ കരിയറിൽ അവാർഡുകൾ കിട്ടാത്തതിനെക്കുറിച്ച് തനിക്ക് വിഷമം തോന്നിയിട്ടില്ലെന്നും, ഇപ്പോഴും പ്രേക്ഷകരിൽനിന്ന് ലഭിക്കുന്ന സ്നേഹവും അംഗീകാരവും തന്നെയാണ് ഏറ്റവും വലിയ അവാർഡ് എന്നും അവർ പറഞ്ഞു. ബോഡി ഷെയ്മിങ്ങിനെതിരെ പ്രതികരിച്ച നടി ഗൗരി കിഷൻ്റെ വിഷയത്തെക്കുറിച്ച് സംസാരിച്ച നദിയ, ഗൗരി ആ സാഹചര്യത്തെ വളരെ നന്നായി കൈകാര്യം ചെയ്തു എന്നും അഭിപ്രായപ്പെട്ടു.
