തൊടുപുഴ: മലയാളികൾ ആകാംഷയോടെ കാത്തിരിക്കുന്ന മോഹൻലാൽ-ജീത്തു ജോസഫ് ചിത്രം ‘ദൃശ്യം 3’-ൻ്റെ പ്രധാനപ്പെട്ട ഷെഡ്യൂൾ ജോർജുകുട്ടിയുടെ വീടായ തൊടുപുഴ വഴിത്തലയിലെ വീട്ടിൽ പൂർത്തിയായി. സിനിമയുടെ മൂന്ന് ഭാഗങ്ങൾക്കും സാക്ഷ്യം വഹിച്ച ഈ വീടും പരിസരവുമാണ് ഇത്തവണയും ചിത്രീകരണത്തിന് വേദിയായത്.
കഴിഞ്ഞ 13 ദിവസങ്ങളിലായി നടന്ന ചിത്രീകരണമാണ് ചൊവ്വാഴ്ച പാക്കപ്പ് ആയത്. കഥാപാത്രങ്ങൾക്കുവേണ്ടി സിനിമയുടെ അണിയറപ്രവർത്തകർ വീട്ടിൽ ശ്രദ്ധേയമായ മാറ്റങ്ങളാണ് വരുത്തിയത്. പുതിയൊരു കാർ ഷെഡ് നിർമ്മിച്ചതും, വീടിൻ്റെ പുറംഭാഗം പെയിൻ്റ് ചെയ്തതും മാറ്റങ്ങളിൽ ഉൾപ്പെടുന്നു. കൂടാതെ, വീടിനോട് ചേർന്ന പറമ്പിൽ ജെ.സി.ബി ഉപയോഗിച്ച് വാഴകൾ നട്ടതും ശ്രദ്ധേയമായി.
ചിത്രീകരണ സമയത്ത് വീട്ടുടമസ്ഥനായ എം.കെ. ജോസഫും കുടുംബവും ഒരു മുറിയിലേക്ക് താമസം മാറ്റി, വീടിന്റെ ബാക്കി ഭാഗങ്ങൾ സിനിമയുടെ ആവശ്യങ്ങൾക്കായി വിട്ടുനൽകുകയായിരുന്നു. ഭക്ഷണമുൾപ്പെടെയുള്ള കാര്യങ്ങൾ സിനിമാ ടീമിൻ്റെ കാൻ്റീനിൽ നിന്നാണ് ജോസഫിനും കുടുംബത്തിനും എത്തിച്ചു നൽകിയത്.
ട്വിസ്റ്റ് ഒളിപ്പിച്ച മണ്ണിൽ വാഴക്കുലകൾ
ദൃശ്യം ഒന്നാം ഭാഗത്തിൽ ഏറ്റവും അധികം ചർച്ചയായ ‘പശുവിൻ്റെ ജഡം കുഴിച്ചിട്ട’ രംഗം ചിത്രീകരിച്ച പറമ്പിൻ്റെ ഭാഗത്ത് ഇപ്പോൾ സമൃദ്ധമായി വാഴകൾ കുലച്ചു നിൽപ്പുണ്ട്. കാലം മാറുമ്പോൾ ജോർജുകുട്ടിയുടെ ലോകത്തും മാറ്റങ്ങൾ സംഭവിക്കുന്നു എന്ന് ഇത് സൂചന നൽകുന്നു.
ദൃശ്യം സിനിമയിലെ പ്രധാന കഥാപാത്രമായ പോലീസ് സ്റ്റേഷൻ സെറ്റ് ചെയ്ത കൈപ്പക്കവലയിൽ ഇത്തവണയും ഷൂട്ടിംഗ് ഉണ്ടായിരുന്നു. സിനിമയുടെ ക്ലൈമാക്സ് രഹസ്യങ്ങളായി നിലനിർത്തി, ചിത്രീകരണത്തിനായി വാഗമൺ, എറണാകുളം തുടങ്ങിയ മറ്റ് ലൊക്കേഷനുകളിലേക്കും ദൃശ്യം ടീം പോയിരുന്നു.
ജോർജുകുട്ടിയുടെ ജീവിതത്തിൽ സംഭവിക്കാൻ പോകുന്ന അടുത്ത വലിയ ട്വിസ്റ്റ് എന്തായിരിക്കും എന്ന ആകാംഷയിലാണ് സിനിമാ ലോകവും ആരാധകരും.
