കൊച്ചി: മലയാള സിനിമയിലെ ഇതിഹാസ താരം ശ്രീനിവാസന്റെ വിയോഗത്തിൽ വികാരാധീനനായി നടൻ ടിനി ടോം. ശ്രീനിവാസന്റെ വിയോഗവാർത്തയറിഞ്ഞ് എത്തിയവരിൽ നടൻ ടിനി ടോം പ്രത്യേകമായി ശ്രദ്ധിച്ചത് സംവിധായകൻ സത്യൻ അന്തിക്കാടിന്റെ മുഖമായിരുന്നു. മലയാളികൾക്ക് ഒരുപാട് ചിരിമുഹൂർത്തങ്ങൾ സമ്മാനിച്ച സത്യൻ അന്തിക്കാട് സിനിമകളിലെ കരുത്തുറ്റ കഥാപാത്രങ്ങളായിരുന്ന കെ.പി.എ.സി ലളിതയും, ഇന്നസെന്റും, കവിയൂർ പൊന്നമ്മയും ഇപ്പോൾ ശ്രീനിവാസനും വിടവാങ്ങിയതോടെ സത്യൻ അന്തിക്കാടിന്റെ ലോകത്ത് വലിയൊരു ശൂന്യതയാണ് നിഴലിക്കുന്നതെന്ന് ടിനി ടോം പറഞ്ഞു.
ശ്രീനിവാസൻ അനുസ്മരണ വേദിയിൽ സംസാരിക്കുകയായിരുന്നു അദ്ദേഹം. സത്യൻ അന്തിക്കാട് സിനിമകളിലെ കഥാപാത്രങ്ങൾ കേവലം സിനിമാ താരങ്ങളല്ലെന്നും അവരൊക്കെയും യഥാർത്ഥ മനുഷ്യരൂപങ്ങളാണെന്നും ടിനി ടോം കൂട്ടിച്ചേർത്തു. അവരെയൊക്കെ കണ്ട് തമാശ പഠിച്ച ഒരാളെന്ന നിലയിൽ ആ മുഖങ്ങൾ ഒന്നൊന്നായി മായുന്നത് കാണുമ്പോൾ വലിയ വേദന തോന്നുന്നുണ്ടെന്ന് അദ്ദേഹം പറഞ്ഞു.
ഫെഫ്കയ്ക്ക് ഹൃദയം തൊട്ടുള്ള നന്ദി സിനിമാ താരങ്ങളുടെയും പ്രവർത്തകരുടെയും വിയോഗസമയത്ത് ‘ഫെഫ്ക’ (FEFKA) നടത്തുന്ന പ്രവർത്തനങ്ങളെ ടിനി ടോം പ്രസംഗത്തിൽ പ്രത്യേകം അഭിനന്ദിച്ചു. “മഴയും വെയിലും നോക്കാതെ, മരിച്ച വ്യക്തി സംഘടനയിലെ അംഗമാണോ എന്ന് പോലും നോക്കാതെ ഓടിനടന്ന് പ്രവർത്തിക്കുന്ന തൊഴിലാളികളുടെ സാന്നിധ്യം കാണുമ്പോൾ ഇനി മരിക്കാൻ പോലും പേടിയില്ലെന്ന് തോന്നിപ്പോകുന്നു” എന്ന് ടിനി ടോം വൈകാരികമായി പറഞ്ഞു. ഫെഫ്ക അംഗങ്ങളായ സോഹൻ സീനുലാൽ, അനിൽ തോമസ് തുടങ്ങിയവരുടെ സേവനങ്ങൾക്ക് അദ്ദേഹം നന്ദി അറിയിച്ചു.
പൂർത്തിയാക്കാത്ത കഥയുമായി മടക്കം ശ്രീനിവാസന്റെ അവസാന കാലത്തെക്കുറിച്ച് സംസാരിക്കവെ, അദ്ദേഹം ഒരു കഥ എഴുതിത്തുടങ്ങിയിരുന്നുവെന്നും എന്നാൽ അത് പൂർത്തിയാക്കാൻ നിൽക്കാതെയാണ് യാത്രയായതെന്നും ടിനി ടോം അനുസ്മരിച്ചു. “മറ്റേതെങ്കിലും ഒരു തീരത്ത് വെച്ച് നമുക്ക് വീണ്ടും കണ്ടുമുട്ടാം, അവിടെയും ഒരു സത്യൻ അന്തിക്കാട് സിനിമ നമുക്ക് പ്രതീക്ഷിക്കാം” എന്ന വാക്കുകളോടെയാണ് ടിനി ടോം തന്റെ പ്രസംഗം അവസാനിപ്പിച്ചത്. ക്യാമറയ്ക്ക് മുന്നിലെ ശ്രീനിവാസന്റെ അവസാന നിമിഷങ്ങളിലും അമൃത ഹോസ്പിറ്റലിലെ ചികിത്സാ കാലയളവിലും അദ്ദേഹത്തോടൊപ്പമുണ്ടായിരുന്ന ഓർമ്മകളും ടിനി ടോം പങ്കുവെച്ചു.
