കൊച്ചി: നടൻ മോഹൻലാലിന്റെ മാതാവ് ശാന്തകുമാരിയുടെ വേർപാടിൽ അനുശോചനം രേഖപ്പെടുത്തി നടൻ അനൂപ് മേനോൻ. മോഹൻലാൽ എന്ന വ്യക്തിയുടെയും നടന്റെയും ജീവിതത്തിൽ ആ അമ്മ ചെലുത്തിയ സ്വാധീനം എത്രത്തോളമാണെന്ന് വ്യക്തമാക്കുന്നതായിരുന്നു അദ്ദേഹത്തിന്റെ വാക്കുകൾ. സോഷ്യൽ മീഡിയയിലൂടെയാണ് അനൂപ് മേനോൻ തന്റെ ആദരാഞ്ജലികൾ അർപ്പിച്ചത്.
മോഹൻലാലിന് തന്റെ അമ്മയോടുണ്ടായിരുന്ന അഗാധമായ ബന്ധത്തെക്കുറിച്ച് അനൂപ് മേനോൻ കുറിച്ചു. “ലാലേട്ടന്റെ ആത്മാവിന്റെ പാതിയായിരുന്നു ആ അമ്മ. ഷൂട്ടിംഗ് സെറ്റുകളിലായാലും യാത്രകളിലായാലും ലാലേട്ടന്റെ മനസ്സ് എപ്പോഴും അമ്മയ്ക്കൊപ്പമായിരുന്നു. അദ്ദേഹത്തിന്റെ ജീവിതത്തിലെ ഏറ്റവും വലിയ കരുത്തും ആ തണലായിരുന്നു,” അനൂപ് മേനോൻ ഓർത്തെടുത്തു.
വാർദ്ധക്യസഹജമായ അസുഖങ്ങളെത്തുടർന്ന് ചികിത്സയിലായിരുന്ന ശാന്തകുമാരി ചൊവ്വാഴ്ചയാണ് അന്തരിച്ചത്. ലാലേട്ടനെ ആശ്വസിപ്പിക്കാൻ വാക്കുകളില്ലെന്നും ആ അമ്മയുടെ ആത്മാവിന് നിത്യശാന്തി നേരുന്നുവെന്നും അദ്ദേഹം കൂട്ടിച്ചേർത്തു. മോഹൻലാലിന്റെ കൊച്ചിയിലെ വീട്ടിൽ വെച്ച് അദ്ദേഹത്തെ നേരിൽ കണ്ട് അനൂപ് മേനോൻ ആശ്വാസവാക്കുകൾ പങ്കുവെക്കുകയും ചെയ്തിരുന്നു.
സിനിമാ ലോകത്തെ നിരവധി പ്രമുഖർ ശാന്തകുമാരിയുടെ വിയോഗത്തിൽ അനുശോചനം രേഖപ്പെടുത്തിക്കൊണ്ടിരിക്കുകയാണ്. മകന്റെ വിജയങ്ങളിൽ എന്നും നിശബ്ദമായ പ്രാർത്ഥനയോടെ കൂടെനിന്ന ആ അമ്മയുടെ വിയോഗം ലാലിന് വ്യക്തിപരമായി വലിയൊരു നഷ്ടമാണെന്ന് സഹപ്രവർത്തകർ ഒരേസ്വരത്തിൽ പറയുന്നു. തിരുവനന്തപുരം മുടവൻമുകളിലെ വീട്ടുവളപ്പിലാണ് സംസ്കാര ചടങ്ങുകൾ നടക്കുന്നത്.
