ചെന്നൈ: തമിഴ് സൂപ്പർ താരം വിജയ്യുടെ അവസാന സിനിമ എന്ന നിലയിൽ ആരാധകർ ഏറെ പ്രതീക്ഷയോടെ കാത്തിരിക്കുന്ന ‘ജനനായകൻ’ റിലീസ് പ്രതിസന്ധിയിൽ. സെൻസർ സർട്ടിഫിക്കറ്റ് ലഭിക്കുന്നതുമായി ബന്ധപ്പെട്ട് നിർമ്മാതാക്കൾ നൽകിയ ഹർജിയിൽ മദ്രാസ് ഹൈക്കോടതി ജനുവരി 9-ന് വിധി പറയും. ചിത്രം തിയേറ്ററുകളിൽ എത്താൻ നിശ്ചയിച്ചിരുന്ന അതേ ദിവസം തന്നെയാണ് കോടതി വിധിയും വരുന്നത് എന്നത് ആശങ്ക വർദ്ധിപ്പിക്കുന്നു.
സെൻസർ ബോർഡ് നിർദ്ദേശിച്ച മാറ്റങ്ങൾ വരുത്തിയിട്ടും സർട്ടിഫിക്കറ്റ് നൽകാൻ അധികൃതർ തയ്യാറാകുന്നില്ലെന്നാണ് നിർമ്മാതാക്കളുടെ പരാതി. എന്നാൽ, ചിത്രത്തിൽ മതവികാരം വ്രണപ്പെടുത്തുന്ന ദൃശ്യങ്ങൾ ഉണ്ടെന്നും സായുധ സേനയെ വികലമായി ചിത്രീകരിച്ചുവെന്നും ആരോപിച്ച് പരാതികൾ ലഭിച്ചതിനാലാണ് നടപടികൾ വൈകുന്നതെന്ന് സെൻസർ ബോർഡ് കോടതിയെ അറിയിച്ചു. ചിത്രം വീണ്ടും പരിശോധിക്കാൻ റിവൈസിങ് കമ്മിറ്റിക്ക് കൈമാറിയിരിക്കുകയാണ്.
ഏകദേശം 500 കോടി രൂപ ചിലവിൽ നിർമ്മിച്ച ചിത്രം 5000-ത്തോളം തിയേറ്ററുകളിൽ ഒരേസമയം റിലീസ് ചെയ്യാനാണ് അണിയറപ്രവർത്തകർ പദ്ധതിയിട്ടിരുന്നത്. അനാവശ്യമായ ഈ കാലതാമസം വലിയ സാമ്പത്തിക നഷ്ടമുണ്ടാക്കുമെന്നും റിലീസ് വൈകുന്നത് സിനിമയുടെ ഹൈപ്പിനെ ബാധിക്കുമെന്നും നിർമ്മാതാക്കൾ കോടതിയിൽ വാദിച്ചു. റിലീസ് തീയതി ജനുവരി 10-ലേക്ക് മാറ്റുന്നതിൽ എതിർപ്പുണ്ടോ എന്ന് കോടതി ആരാഞ്ഞു.
അതിനിടെ, രാഷ്ട്രീയ ആരോപണങ്ങളും ഈ വിഷയത്തിൽ ഉയരുന്നുണ്ട്. ശിവകാർത്തികേയന്റെ ‘പരാശക്തി’ എന്ന സിനിമയ്ക്ക് വേണ്ടി ‘ജനനായകന്റെ’ റിലീസ് ബോധപൂർവ്വം വൈകിപ്പിക്കാൻ ഡി.എം.കെ സർക്കാർ ശ്രമിക്കുകയാണെന്ന് വിജയ് ആരാധകർ ആരോപിക്കുന്നു. ടിക്കറ്റ് നിരക്കിനെച്ചൊല്ലി ഉടമകളുമായി തർക്കം നിലനിൽക്കുന്നുണ്ടെങ്കിലും പലയിടങ്ങളിലും അഡ്വാൻസ് ബുക്കിംഗ് ആരംഭിച്ചിട്ടുണ്ട്. കോടതി വിധിക്കായി ആകാംക്ഷയോടെ കാത്തിരിക്കുകയാണ് സിനിമാ ലോകം.
