കെ.ജി.എഫ് താരം യഷിനെ നായകനാക്കി ഗീതു മോഹൻദാസ് സംവിധാനം ചെയ്യുന്ന ‘ടോക്സിക്’ എന്ന ചിത്രത്തിന്റെ ടീസറിന് സോഷ്യൽ മീഡിയയിൽ വലിയ ചർച്ചകൾക്കാണ് തുടക്കമിട്ടിരിക്കുന്നത്. ടീസറിലെ ചില ദൃശ്യങ്ങളെ ‘അശ്ലീലം’ എന്ന് വിളിച്ച് അധിക്ഷേപിച്ചവർക്ക് നടി റിമ കല്ലിങ്കൽ പങ്കുവെച്ച ഒരു പോസ്റ്റ് റീ-ഷെയർ ചെയ്തുകൊണ്ടാണ് ഗീതു തന്റെ നിലപാട് വ്യക്തമാക്കിയത്. “ഞാനിപ്പോൾ പറഞ്ഞു കഴിഞ്ഞു” (I’ve said it now) എന്ന ലളിതമായ കുറിപ്പോടെയാണ് ഗീതു ഈ മറുപടി നൽകിയത്.
സ്ത്രീകളുടെ ലൈംഗിക സംതൃപ്തിയെയും സമ്മതത്തെയും കുറിച്ചും, നിലനിൽക്കുന്ന വ്യവസ്ഥിതികളെ സ്ത്രീകൾ തങ്ങൾക്കനുകൂലമായി എങ്ങനെ മാറ്റുന്നു എന്നതിനെക്കുറിച്ചും ലോകം ഇനിയും പഠിച്ചു വരുന്നതേയുള്ളൂവെന്ന റിമ കല്ലിങ്കലിന്റെ കുറിപ്പാണ് ഗീതു പങ്കുവെച്ചത്. ലൈംഗികതയെ സദാചാരത്തിന്റെ കണ്ണടയിലൂടെ മാത്രം നോക്കിക്കാണുന്ന സമൂഹത്തിന്റെ ഇരട്ടത്താപ്പിനെ റിമ തന്റെ പോസ്റ്റിലൂടെ വിമർശിച്ചിരുന്നു. ഈ കാഴ്ചപ്പാടിനോട് താനും യോജിക്കുന്നുവെന്ന് വ്യക്തമാക്കുകയാണ് ഗീതു തന്റെ പ്രതികരണത്തിലൂടെ ചെയ്തത്.
ഗീതുവിന് പിന്തുണയുമായി റിമയെക്കൂടാതെ ആഷിക്ക് അബു, ദിവ്യപ്രഭ തുടങ്ങിയ പ്രമുഖരും രംഗത്തെത്തിയിട്ടുണ്ട്. “ആനന്ദം, സദാചാര പ്രതിസന്ധി, പിന്നെ സ്ത്രീകളും…” എന്ന തലക്കെട്ടോടെ പ്രചരിച്ച കുറിപ്പ് പങ്കുവെച്ചാണ് ഇവർ സംവിധായികയ്ക്ക് ഐക്യദാർഢ്യം പ്രഖ്യാപിച്ചത്. സിനിമയിലെ രാഷ്ട്രീയത്തോടും ക്രാഫ്റ്റിനോടും തങ്ങൾ ഒപ്പമുണ്ടെന്ന് ഇവർ പറഞ്ഞു വെക്കുന്നു.
ടീസറിലെ ദൃശ്യങ്ങൾ വലിയ തോതിൽ വൈറലായെങ്കിലും ഒരു വിഭാഗം ആളുകൾ ഇതിനെതിരെ കടുത്ത വിമർശനമാണ് ഉന്നയിക്കുന്നത്. എന്നാൽ, സ്ത്രീകളുടെ സ്വയംഭരണാധികാരത്തെയും ആനന്ദത്തെയും കുറിച്ചുള്ള ഗൗരവകരമായ ചർച്ചകൾക്കാണ് സിനിമയ്ക്ക് മുന്നോടിയായി ഈ വിവാദങ്ങൾ വഴിതുറന്നിരിക്കുന്നത്. വൻ ബജറ്റിലൊരുങ്ങുന്ന ‘ടോക്സിക്’ അന്താരാഷ്ട്ര നിലവാരത്തിലുള്ള മേക്കിംഗിലൂടെ ഇതിനോടകം തന്നെ വലിയ ഹൈപ്പ് സ്വന്തമാക്കിയിട്ടുണ്ട്.
