യഷ് നായകനാകുന്ന ‘ടോക്സിക്’ എന്ന ചിത്രത്തിന്റെ ടീസറുമായി ബന്ധപ്പെട്ട വിവാദങ്ങൾ പുതിയ തലത്തിലേക്ക് നീങ്ങുകയാണ്. ചിത്രത്തിന്റെ സംവിധായിക ഗീതു മോഹൻദാസിനെയും നടി റിമ കല്ലിങ്കലിനെയും രൂക്ഷമായ ഭാഷയിലാണ് വിജയ് ബാബു വിമർശിച്ചിരിക്കുന്നത്. ‘ഇരട്ടത്താപ്പിന്റെ രാജ്ഞിമാർ’ എന്നാണ് ഇവരെ വിശേഷിപ്പിച്ചത്.
ടീസറിലെ ദൃശ്യങ്ങൾ പകർപ്പവകാശം ലംഘിച്ചുവെന്ന ആരോപണങ്ങൾ ഉയർന്നപ്പോൾ അതിനെ ന്യായീകരിച്ച ഗീതുവിന്റെ നിലപാടിനെ വിജയ് ബാബു ചോദ്യം ചെയ്യുന്നു. മറ്റുള്ളവരുടെ സൃഷ്ടികളെ ബഹുമാനിക്കാത്തവർ സ്വന്തം കാര്യത്തിൽ മാത്രം നിയമം പറയുന്നതിലെ വൈരുദ്ധ്യമാണ് അദ്ദേഹം ചൂണ്ടിക്കാട്ടുന്നത്. ഇവരുടെ കഥ പറഞ്ഞു തുടങ്ങിയാൽ അത് അവസാനിക്കില്ലെന്നും വിജയ് ബാബു പരിഹാസരൂപേണ പറഞ്ഞു.
സിനിമയിലെ സ്ത്രീ കൂട്ടായ്മയായ ഡബ്ല്യുസിസിയുടെ മുൻനിരയിലുള്ള ഇവർക്കെതിരെ ഇതിനുമുമ്പും സിനിമാരംഗത്തുനിന്ന് വിമർശനങ്ങൾ ഉയർന്നിട്ടുണ്ട്. നിതിൻ രഞ്ജി പണിക്കർ ഉൾപ്പെടെയുള്ളവരും ഈ വിഷയത്തിൽ പ്രതികരണവുമായി രംഗത്തെത്തിയിരുന്നു. ടോക്സിക് ടീസറിലെ ചില ഭാഗങ്ങൾ അനുവാദമില്ലാതെ ഉപയോഗിച്ചുവെന്ന വാദങ്ങളെ സംവിധായിക പ്രതിരോധിക്കുന്നതിനിടെയാണ് വിജയ് ബാബുവിന്റെ ഈ കടന്നാക്രമണം.
