കഴിഞ്ഞ പത്ത് വർഷമായി മലയാള സിനിമാ വ്യവസായത്തിന് വേണ്ടി സംസ്ഥാന സർക്കാർ ഒന്നും ചെയ്തിട്ടില്ലെന്ന് പ്രശസ്ത നിർമ്മാതാവും കേരള ഫിലിം ചേംബർ ഓഫ് കൊമേഴ്സ് പ്രസിഡന്റുമായ ജി. സുരേഷ് കുമാർ. സിനിമയുമായി ബന്ധപ്പെട്ട വിവിധ സംഘടനകളുടെ സംയുക്ത യോഗത്തിന് ശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം. നിലവിലെ സാഹചര്യത്തിൽ മാറ്റമുണ്ടായില്ലെങ്കിൽ ജൂൺ ഒന്ന് മുതൽ സിനിമാ ചിത്രീകരണവും പ്രദർശനവും നിർത്തിവെക്കുമെന്നും അദ്ദേഹം മുന്നറിയിപ്പ് നൽകി.
മലയാള സിനിമ നേരിടുന്ന പ്രധാന വെല്ലുവിളി ഇരട്ട നികുതിയാണെന്ന് അദ്ദേഹം ചൂണ്ടിക്കാട്ടി. ജി.എസ്.ടിക്ക് പുറമെ തദ്ദേശ സ്ഥാപനങ്ങൾ ഈടാക്കുന്ന വിനോദ നികുതി കൂടി ചേരുമ്പോൾ വരുമാനത്തിന്റെ 30 ശതമാനത്തോളം സർക്കാരിലേക്കാണ് പോകുന്നത്. ഒരു സിനിമ 100 കോടി രൂപ നേടിയാൽ 30 കോടി നികുതിയായും ബാക്കി സിനിമാശാലകൾക്കും മറ്റുമായി വീതിക്കപ്പെടുമ്പോൾ നിർമ്മാതാവിന് ലഭിക്കുന്നത് തുച്ഛമായ തുക മാത്രമാണെന്നും സുരേഷ് കുമാർ വ്യക്തമാക്കി.
താരങ്ങളുടെയും സാങ്കേതിക പ്രവർത്തകരുടെയും ഭീമമായ പ്രതിഫലമാണ് സിനിമാ മേഖലയെ തളർത്തുന്ന മറ്റൊരു ഘടകം. നിർമ്മാണ ചെലവിന്റെ ഏറിയ പങ്കും താരങ്ങളുടെ ശമ്പളത്തിനായി മാറ്റിവെക്കേണ്ടി വരുന്നു. കഴിഞ്ഞ വർഷം പുറത്തിറങ്ങിയ 200 സിനിമകളിൽ കേവലം 24 എണ്ണം മാത്രമാണ് വിജയിച്ചത്. ഇത് മൂലം നിർമ്മാതാക്കൾക്ക് 600 മുതൽ 700 കോടി രൂപയുടെ വരെ നഷ്ടം സംഭവിച്ചിട്ടുണ്ടെന്നും അദ്ദേഹം വെളിപ്പെടുത്തി.
സിനിമാ മേഖലയിലെ പ്രശ്നങ്ങൾ പരിഹരിക്കാനെന്ന പേരിൽ സർക്കാർ നടത്തുന്ന സിനിമാ കോൺക്ലേവ് വെറും പ്രഹസനമാണെന്നും ജി. സുരേഷ് കുമാർ വിമർശിച്ചു. യഥാർത്ഥ പ്രശ്നങ്ങളിൽ ഇടപെടാതെ സർക്കാർ കണ്ണിൽ പൊടിയിടുകയാണ്. സിനിമാ നിർമ്മാണ രംഗം വലിയൊരു തകർച്ചയെ അഭിമുഖീകരിക്കുകയാണെന്നും സർക്കാർ അടിയന്തിരമായി ഇടപെട്ടില്ലെങ്കിൽ വ്യവസായം തന്നെ ഇല്ലാതാകുമെന്നും അദ്ദേഹം കൂട്ടിച്ചേർത്തു.
