ബോളിവുഡ് സിനിമാ മേഖലയിൽ താൻ നേരിടുന്ന വിവേചനങ്ങളെക്കുറിച്ച് സംഗീത മാന്ത്രികൻ എ.ആർ. റഹ്മാൻ നടത്തിയ വെളിപ്പെടുത്തലുകൾക്ക് പിന്നാലെ അദ്ദേഹത്തിന് ശക്തമായ പിന്തുണ അറിയിച്ച് വരുൺ ഗ്രോവർ രംഗത്തെത്തി. കഴിഞ്ഞ മൂന്ന് പതിറ്റാണ്ടായി ഇന്ത്യ കണ്ട ഏറ്റവും മികച്ച സംഗീതജ്ഞൻ തന്റെ അനുഭവങ്ങൾ സഭ്യമായ രീതിയിൽ പങ്കുവെച്ചപ്പോൾ അതിനെ വ്യക്തിപരമായി അധിക്ഷേപിക്കുന്ന പ്രവണതയാണ് ഉണ്ടായതെന്ന് വരുൺ ഗ്രോവർ സോഷ്യൽ മീഡിയയിൽ കുറിച്ചു.
ഹിന്ദി സിനിമാ ലോകത്തെ അധികാര കേന്ദ്രങ്ങളിൽ വന്ന മാറ്റങ്ങളും വർഗീയമായ ചില ഇടപെടലുകളും തനിക്ക് അവസരങ്ങൾ കുറയാൻ കാരണമാകുന്നുണ്ടെന്ന് റഹ്മാൻ ഒരു അഭിമുഖത്തിൽ സൂചിപ്പിച്ചിരുന്നു. ഇത് വലിയ ചർച്ചയായതോടെ റഹ്മാനെതിരെ സോഷ്യൽ മീഡിയയിൽ വലിയ രീതിയിലുള്ള ആക്രമണങ്ങൾ നടന്നു. എന്നാൽ തന്റെ അനുഭവത്തിൽ നിന്നുള്ള കാര്യങ്ങൾ മാത്രമാണ് അദ്ദേഹം പറഞ്ഞതെന്നും അതിന് അദ്ദേഹത്തെ വേട്ടയാടുന്നത് ശരിയല്ലെന്നും വരുൺ ഗ്രോവർ വ്യക്തമാക്കി.
റഹ്മാന്റെ ‘ലഗാൻ’ എന്ന ചിത്രത്തിലെ ‘ഓ പാലൻഹാരെ’ എന്ന ഗാനം പങ്കുവെച്ചുകൊണ്ടാണ് വരുൺ തന്റെ നിലപാട് അറിയിച്ചത്. “ഏറ്റവും സഭ്യമായ രീതിയിൽ തന്റെ അഭിപ്രായം പറഞ്ഞതിന് ഒരു വലിയ കലാകാരനെ ആക്രമിക്കുകയും പിന്നീട് ഒരു വിശദീകരണം നൽകാൻ അദ്ദേഹത്തെ നിർബന്ധിതനാക്കുകയും ചെയ്യുന്നത് നിർഭാഗ്യകരമാണ്,” വരുൺ ഗ്രോവർ പറഞ്ഞു. ഈ സംഭവം തന്നെ ഇൻഡസ്ട്രിയിലെ വിഭജനത്തിന്റെ തെളിവാണെന്നും അദ്ദേഹം കൂട്ടിച്ചേർത്തു.
റഹ്മാന്റെ വെളിപ്പെടുത്തലുകളെ ബി-ടൗണിലെ പല പ്രമുഖരും എതിർത്തപ്പോൾ വരുൺ ഗ്രോവർ, പരേഷ് രാവൽ, എസ്.ജെ. സൂര്യ തുടങ്ങിയവർ അദ്ദേഹത്തിന് പിന്തുണയുമായി എത്തിയത് ശ്രദ്ധേയമായി. തന്റെ വാക്കുകൾ തെറ്റായി വ്യാഖ്യാനിക്കപ്പെട്ടതിൽ വിഷമമുണ്ടെന്നും ഇന്ത്യ തന്റെ വീടും പ്രചോദനവുമാണെന്നും വ്യക്തമാക്കി റഹ്മാൻ പിന്നീട് ഒരു വീഡിയോ സന്ദേശം പങ്കുവെച്ചിരുന്നു.
