വാഹന അപകടവുമായി ബന്ധപ്പെട്ട് തനിക്കെതിരെ ഉയർന്ന ആരോപണങ്ങളിൽ വിശദീകരണവുമായി നടൻ മണിയൻപിള്ള രാജു രംഗത്തെത്തി. തൻ്റെ ഭാഗത്തുനിന്നുണ്ടായ വീഴ്ചയല്ല അപകടത്തിന് കാരണമായതെന്ന് സിസിടിവി ദൃശ്യങ്ങളിലൂടെ വ്യക്തമായതിൽ വലിയ ആശ്വാസമുണ്ടെന്ന് അദ്ദേഹം പറഞ്ഞു. ഒരു പൊതുപരിപാടി കഴിഞ്ഞ് മടങ്ങുന്നതിനിടെയാണ് അപകടം സംഭവിച്ചത്. റോഡ് മുറിച്ചുകടക്കുന്നതിനിടെ അമിതവേഗതയിൽ വന്ന വാഹനം തൻ്റെ കാറിൽ ഇടിക്കുകയായിരുന്നുവെന്ന് അദ്ദേഹം വ്യക്തമാക്കി.
അപകടസമയത്ത് വാഹനം നിർത്താതെ പോയത് ഭയം മൂലമാണെന്നും താരം വെളിപ്പെടുത്തി. തനിക്ക് ചിക്കൻഗുനിയ ബാധിച്ച് ശാരീരിക ബുദ്ധിമുട്ടുകൾ ഉണ്ടായിരുന്നുവെന്നും, ഒറ്റയ്ക്കായിരുന്ന സമയത്ത് ആളുകൾ കൂടുമ്പോൾ ഉണ്ടായേക്കാവുന്ന ആക്രമണങ്ങളെ ഭയന്നാണ് അവിടെനിന്ന് മാറിയതെന്നും അദ്ദേഹം പറഞ്ഞു. എന്നാൽ ഉടൻതന്നെ സുഹൃത്തുക്കളെ വിളിച്ച് പരിക്കേറ്റവർക്കായി ആംബുലൻസ് സൗകര്യം ഏർപ്പാടാക്കാൻ ആവശ്യപ്പെട്ടിരുന്നു.
അപകടത്തിൽ പരിക്കേറ്റ കുട്ടികളെ നേരിൽ പോയി കാണുമെന്നും അദ്ദേഹം അറിയിച്ചു. മനുഷ്യത്വപരമായ പരിഗണന നൽകി അവരെ കാണേണ്ടത് തൻ്റെ കടമയാണെന്ന് കരുതുന്നതായും അദ്ദേഹം കൂട്ടിച്ചേർത്തു. വാഹന ഇൻഷുറൻസ് നടപടികൾക്കായി കേസ് ആവശ്യമാണെന്നും, നിയമപരമായ കാര്യങ്ങൾ കൃത്യമായി നടക്കട്ടെ എന്നും അദ്ദേഹം പറഞ്ഞു. വർഷങ്ങളായി വളരെ ജാഗ്രതയോടെ വാഹനം ഓടിക്കുന്ന ആളാണ് താനെന്നും മണിയൻപിള്ള രാജു വ്യക്തമാക്കി.
