തമിഴ്നാട് സർക്കാരിന്റെ ചലച്ചിത്ര പുരസ്കാര പ്രഖ്യാപനത്തിന് പിന്നാലെ വലിയ രീതിയിലുള്ള ചർച്ചകളും വിവാദങ്ങളും ഉയരുകയാണ്. ഇതുവരെ തിയറ്ററുകളിൽ എത്തുകയോ ഒടിടി പ്ലാറ്റ്ഫോമുകളിൽ റിലീസ് ചെയ്യുകയോ ചെയ്യാത്ത ‘സണ്ടക്കാരി’ എന്ന ചിത്രം മൂന്ന് പ്രധാന അവാർഡുകൾ കരസ്ഥമാക്കിയതാണ് സിനിമാ ലോകത്തെ അമ്പരപ്പിച്ചിരിക്കുന്നത്. വിമലും ശ്രിയ ശരണും പ്രധാന വേഷങ്ങളിലെത്തിയ ഈ ചിത്രം 2020-ലെ വിഭാഗത്തിലാണ് പുരസ്കാരങ്ങൾക്ക് അർഹമായത്.
മലയാളത്തിൽ ദിലീപും മംമ്ത മോഹൻദാസും കേന്ദ്രകഥാപാത്രങ്ങളെ അവതരിപ്പിച്ചു വൻ വിജയമായ ‘മൈ ബോസ്’ എന്ന ചിത്രത്തിന്റെ തമിഴ് റീമേക്കാണ് സണ്ടക്കാരി. ആർ. മാധേഷ് സംവിധാനം ചെയ്ത ഈ ചിത്രം 2020-ൽ റിലീസിനായി തയ്യാറെടുത്തിരുന്നെങ്കിലും പലവിധ കാരണങ്ങളാൽ പെട്ടിയിലിരിക്കുകയായിരുന്നു. മികച്ച മൂന്നാമത്തെ ചിത്രം, മികച്ച ഗായകൻ (അമ്രിഷ്), മികച്ച കലാസംവിധായകൻ (അയ്യപ്പൻ) എന്നീ പുരസ്കാരങ്ങളാണ് ചിത്രം നേടിയത്.
റിലീസ് ചെയ്ത നിരവധി മികച്ച ചിത്രങ്ങളെ തഴഞ്ഞ്, ആരും കണ്ടിട്ടില്ലാത്ത ഒരു റീമേക്ക് ചിത്രത്തിന് എങ്ങനെ അവാർഡ് നൽകി എന്നതാണ് പ്രധാനമായും ഉയരുന്ന ചോദ്യം. സെൻസർ സർട്ടിഫിക്കറ്റ് ലഭിച്ച സിനിമകൾ അവാർഡിന് പരിഗണിക്കാറുണ്ടെങ്കിലും, പ്രദർശനത്തിന് എത്താത്ത ചിത്രത്തിന്റെ കലാസംവിധാനവും ഗാനവും എങ്ങനെ വിലയിരുത്തപ്പെട്ടു എന്നതിൽ സോഷ്യൽ മീഡിയയിൽ വലിയ പരിഹാസമാണ് ഉയരുന്നത്.
2016 മുതൽ 2022 വരെയുള്ള വർഷങ്ങളിലെ പുരസ്കാരങ്ങൾ ഒന്നിച്ച് പ്രഖ്യാപിച്ചപ്പോൾ മലയാളികൾക്ക് വലിയ നേട്ടങ്ങൾ ലഭിച്ചെങ്കിലും, ഈ വിവാദം തമിഴ് സിനിമാ മേഖലയിൽ വലിയ കരിനിഴൽ വീഴ്ത്തിയിട്ടുണ്ട്. മമ്മൂട്ടിയുടെ ‘പേരൻപ്’ പോലെയുള്ള മികച്ച പ്രകടനങ്ങൾ തഴയപ്പെട്ടതും, ‘സണ്ടക്കാരി’ പോലുള്ള ചിത്രങ്ങൾ തിരഞ്ഞെടുക്കപ്പെട്ടതും ജൂറിയുടെ വിശ്വാസ്യതയെ ചോദ്യം ചെയ്യുന്നതാണെന്നാണ് വിമർശകർ പറയുന്നത്. നിലവിൽ ഉയരുന്ന ആരോപണങ്ങളിൽ സർക്കാരോ പുരസ്കാര സമിതിയോ ഔദ്യോഗിക പ്രതികരണം നടത്തിയിട്ടില്ല.
