താരസംഘടനയായ ‘അമ്മ’യിലെ ഭാരവാഹികൾക്കിടയിൽ നിലനിൽക്കുന്ന രൂക്ഷമായ തർക്കങ്ങളെക്കുറിച്ച് പുതിയ വെളിപ്പെടുത്തലുകളുമായി സംവിധായകൻ ആലപ്പി അഷ്റഫ് രംഗത്തെത്തിയിരിക്കുകയാണ്. നടി നീന കുറുപ്പുമായി ലക്ഷ്മിപ്രിയ നടത്തിയ വാക്പോരിന് മുൻപ് തന്നെ നടി അൻസിബ ഹസ്സനുമായും ലക്ഷ്മിപ്രിയയ്ക്ക് വലിയ രീതിയിലുള്ള പ്രശ്നങ്ങൾ ഉണ്ടായിരുന്നുവെന്ന് അദ്ദേഹം പറയുന്നു. അൻസിബ അയച്ച ഒരു മെസ്സേജിനെ ചൊല്ലിയുണ്ടായ തർക്കം തൃപ്പൂണിത്തറ ഹിൽ പാലസ് വനിതാ പോലീസ് സ്റ്റേഷൻ വരെ എത്തിയെന്നും അവിടെ വെച്ച് ഇരുവരും വലിയ ബഹളമുണ്ടാക്കിയെന്നും അദ്ദേഹം തന്റെ യൂട്യൂബ് ചാനലിലൂടെ വെളിപ്പെടുത്തി.
സംഘടനയുടെ വൈസ് പ്രസിഡന്റ് എന്ന ഉത്തരവാദിത്തപ്പെട്ട സ്ഥാനത്തിരുന്ന് ലക്ഷ്മിപ്രിയ നീന കുറുപ്പിനെതിരെ നടത്തിയ അധിക്ഷേപകരമായ പരാമർശങ്ങൾ ശരിയായില്ലെന്ന് ആലപ്പി അഷ്റഫ് വിമർശിച്ചു. നീന കുറുപ്പിനെതിരെ ലക്ഷ്മിപ്രിയ അയച്ച ശബ്ദസന്ദേശത്തിൽ അങ്ങേയറ്റം മോശമായ വാക്കുകളാണ് ഉപയോഗിച്ചിരിക്കുന്നത്. കുടുംബ സംഗമത്തിനിടെ നടന്ന ഒരു ചെറിയ പിഴവിനെ ചൊല്ലിയായിരുന്നു ഈ രൂക്ഷമായ പ്രതികരണമെന്നും, ഇത്തരം പെരുമാറ്റങ്ങൾ സംഘടനയുടെ അന്തസ്സിന് ചേർന്നതല്ലെന്നും അദ്ദേഹം കൂട്ടിചേർത്തു.
നേരത്തെ പേര് വെളിപ്പെടുത്താതെ താൻ ഈ കാര്യങ്ങൾ സൂചിപ്പിച്ചിരുന്നെങ്കിലും, ഇപ്പോൾ വാർത്തകൾ പരസ്യമായ സാഹചര്യത്തിലാണ് പേര് സഹിതം വിശദീകരണം നൽകുന്നതെന്ന് സംവിധായകൻ വ്യക്തമാക്കി. ‘അമ്മ’യിലെ ആഭ്യന്തര പ്രശ്നങ്ങൾ അത്ര പെട്ടെന്ന് അവസാനിക്കില്ലെന്നാണ് പുതിയ വെളിപ്പെടുത്തലുകൾ സൂചിപ്പിക്കുന്നത്. താരസംഘടനയിലെ പുകയും തീയും ഇപ്പോഴും എരിഞ്ഞുകൊണ്ടിരിക്കുകയാണെന്നും വരും ദിവസങ്ങളിൽ കൂടുതൽ വിവരങ്ങൾ പുറത്തുവന്നേക്കാമെന്നും സിനിമാ വൃത്തങ്ങൾ വിലയിരുത്തുന്നു.
