ഫ്രാൻസിൽ നടക്കുന്ന പ്രശസ്തമായ ‘കാൻസ് 2026’ എഐ ഫിലിം അവാർഡിലേക്ക് കോട്ടയം ചെങ്ങളം സ്വദേശിയായ സച്ചു കുന്നത്തിലിന്റെ ‘ദ് ലൈറ്റ്’ (The Light) തിരഞ്ഞെടുക്കപ്പെട്ടു. എഐ സാങ്കേതികവിദ്യ ഉപയോഗിച്ച് നിർമ്മിച്ച ഈ ആനിമേഷൻ ഷോർട്ട് ഫിലിം ആഗോളതലത്തിൽ ശ്രദ്ധേയമായ നേട്ടമാണ് കൈവരിച്ചിരിക്കുന്നത്. സച്ചു തന്നെയാണ് ചിത്രത്തിന്റെ രചനയും നിർവഹിച്ചിരിക്കുന്നത്. സാധാരണക്കാരന്റെ പിന്തുണയോടെ ക്രൗഡ് ഫണ്ടിങ്ങിലൂടെയാണ് ഈ ചിത്രം പൂർത്തിയാക്കിയത് എന്നത് മറ്റൊരു പ്രത്യേകതയാണ്.
സിനിമയിലെ നൂതനമായ മാറ്റങ്ങളെ ഉൾക്കൊള്ളുന്ന എഐ ആനിമേഷൻ വിഭാഗത്തിലാണ് ‘ദ് ലൈറ്റ്’ മത്സരിക്കുന്നത്. മനോജ് മഹാദേവൻ ആണ് ചിത്രത്തിന്റെ ആനിമേഷനും എഡിറ്റിങ്ങും കൈകാര്യം ചെയ്തിരിക്കുന്നത്. ദേശീയ അവാർഡ് ജേതാവും ‘ബിരിയാണി’ എന്ന ചിത്രത്തിന്റെ സംവിധായകനുമായ സജിൻ ബാബു ആണ് ഈ ചിത്രം അവതരിപ്പിക്കുന്നത്. കാൻസിന് പുറമെ ഇറ്റലിയിൽ നടക്കുന്ന അന്താരാഷ്ട്ര ചലച്ചിത്ര മേളയിലേക്കും ഈ ചിത്രം ഇതിനോടകം തിരഞ്ഞെടുക്കപ്പെട്ടിട്ടുണ്ട്.
കോട്ടയം ഫിലിം സൊസൈറ്റി അംഗമായ സച്ചു കുന്നത്ത് കഴിഞ്ഞ പതിമൂന്ന് വർഷമായി സിനിമാ മേഖലയിൽ സജീവമാണ്. നിലവിൽ ബെംഗളൂരുവിൽ എസ്ബിഐ ക്രെഡിറ്റ് വിഭാഗത്തിൽ ജോലി ചെയ്യുന്ന സച്ചു, തന്റെ ജോലിത്തിരക്കുകൾക്കിടയിലും സിനിമയോടുള്ള അഭിനിവേശം കാത്തുസൂക്ഷിക്കുന്നു. ചെങ്ങളം കുന്നത്ത് വില്ലയിൽ ബിജു കുന്നത്തിന്റെയും സുജ കുരുവിളയുടെയും മകനാണ് അദ്ദേഹം. സോനയാണ് സഹോദരി.
മലയാള സിനിമയിലെ സാങ്കേതിക തികവും പരീക്ഷണാത്മകതയും ആഗോള തലത്തിൽ വീണ്ടും ചർച്ചയാകുന്ന നേട്ടമാണിത്. ആർട്ടിഫിഷ്യൽ ഇന്റലിജൻസ് ഉപയോഗിച്ചുള്ള കഥപറച്ചിലിന് പുതിയ മാനങ്ങൾ നൽകുന്ന ‘ദ് ലൈറ്റ്’ വരും ദിവസങ്ങളിൽ കൂടുതൽ രാജ്യാന്തര വേദികളിൽ പ്രദർശിപ്പിക്കപ്പെടും. ഒരു മലയാളിയുടെ ഈ നേട്ടം കേരളത്തിലെ സിനിമാ പ്രേമികൾക്കും അഭിമാനമായി മാറിയിരിക്കുകയാണ്.
