മധുര: തെന്നിന്ത്യൻ താരം സൂര്യയെ നായകനാക്കി ആർ.ജെ. ബാലാജി സംവിധാനം ചെയ്യുന്ന ബിഗ് ബജറ്റ് ചിത്രം ‘കറുപ്പ്’ മേയ് 14-ന് തിയേറ്ററുകളിലെത്തും. ചിത്രത്തിന്റെ വമ്പിച്ച ഓഡിയോ ലോഞ്ച് കഴിഞ്ഞ ദിവസം മധുരയിലെ സോലൈമലൈ കോളേജ് ഓഫ് എൻജിനീയറിംഗിൽ വെച്ച് നടന്നു. ആയിരക്കണക്കിന് ആരാധകർ തടിച്ചുകൂടിയ ചടങ്ങിൽ സൂര്യ, തൃഷ, സംവിധായകൻ ആർ.ജെ. ബാലാജി, സംഗീത സംവിധായകൻ സായ് അഭ്യങ്കർ തുടങ്ങിയവർ പങ്കെടുത്തു. മധുരയുടെ പശ്ചാത്തലത്തിൽ ഒരുങ്ങുന്ന ചിത്രമായതിനാലാണ് ഓഡിയോ ലോഞ്ചിനായി ഈ നഗരം തന്നെ തിരഞ്ഞെടുത്തത്.
ചടങ്ങിൽ സൂര്യ നടത്തിയ വികാരാധീനമായ പ്രസംഗം ഇതിനോടകം സോഷ്യൽ മീഡിയയിൽ വൈറലായിട്ടുണ്ട്. “ഈ സിനിമയിലെ നായകൻ ഞാനല്ല, കറുപ്പസ്വാമിയാണ്” എന്നാണ് സൂര്യ വേദിയിൽ പറഞ്ഞത്. വിശ്വാസവും നീതിയും പ്രമേയമാകുന്ന ചിത്രം ഒരു പക്കാ കൊമേഴ്സ്യൽ എന്റർടൈനറായിരിക്കുമെന്ന സൂചനയാണ് അണിയറപ്രവർത്തകർ നൽകുന്നത്. സായ് അഭ്യങ്കർ സംഗീതം നൽകിയ ചിത്രത്തിലെ ഗാനങ്ങൾക്കും ഇതിനോടകം മികച്ച പ്രതികരണമാണ് ലഭിക്കുന്നത്. ഏറെ കാലത്തിന് ശേഷം സൂര്യയും തൃഷയും ഒന്നിക്കുന്ന ചിത്രം കൂടിയാണിത്.
ഡ്രീം വാരിയർ പിക്ചേഴ്സ് നിർമ്മിക്കുന്ന ഈ ചിത്രത്തിൽ മലയാള താരങ്ങളായ ഇന്ദ്രൻസ്, ശ്വേത, സ്വാസിക എന്നിവരും പ്രധാന വേഷങ്ങളിലെത്തുന്നുണ്ട്. യോഗി ബാബു, നട്ടി തുടങ്ങിയവരും വലിയൊരു താരനിരയും ചിത്രത്തിലുണ്ട്. ജി.കെ. വിഷ്ണുവാണ് ഛായാഗ്രഹണം നിർവ്വഹിക്കുന്നത്. ‘കങ്കുവ’യ്ക്ക് ശേഷം പുറത്തിറങ്ങുന്ന സൂര്യ ചിത്രമായതുകൊണ്ട് തന്നെ വലിയ പ്രതീക്ഷയോടെയാണ് ആരാധകർ ‘കറുപ്പി’നായി കാത്തിരിക്കുന്നത്. സമ്മർ റിലീസായി എത്തുന്ന ചിത്രം ബോക്സ് ഓഫീസിൽ വലിയ ചലനം സൃഷ്ടിക്കുമെന്നാണ് വിലയിരുത്തൽ.
