എസ്യു അരുണ്‍ കുമാര്‍ വിക്രമിനെ നായകനാക്കി ഒരുക്കുന്ന പുതിയ ചിത്രം ‘വീര ധീര ശൂരന്‍’ വിവാദത്തില്‍. ചിത്രത്തിന്റെ ഫസ്റ്റ് ലുക്ക് പോസ്റ്ററാണ് വിവാദമായിരിക്കുന്നത്. ഇരുകൈകളിലും കത്തിയുമായി നില്‍ക്കുന്ന വിക്രമിന്റെ ചിത്രമാണ് ഫസ്റ്റ്ലുക്ക് പോസ്റ്റര്‍ ആയി പുറത്തുവിട്ടത്.
വിക്രമിന്റെ പിറന്നാള്‍ ദിനത്തില്‍ ഏപ്രില്‍ 17ന് ആയിരുന്നു പോസ്റ്റര്‍ പുറത്തെത്തിയത്. ഇരുകൈകളിലും കത്തിയുമായി നില്‍ക്കുന്ന പോസ്റ്റര്‍ യുവാക്കള്‍ക്കിടയില്‍ അക്രമം പ്രോത്സാഹിപ്പിക്കുമെന്നാണ് ആരോപണം. ഇതുസംബന്ധിച്ച് സാമൂഹ്യ പ്രവര്‍ത്തകനായ സെല്‍വം ചെന്നൈ പൊലീസ് കമ്മീഷണര്‍ക്ക് പരാതി നല്‍കി.
യുവാക്കള്‍ക്കിടയില്‍ തെറ്റായ ആശയം പ്രചരിപ്പിക്കുകയാണ് വിക്രമും സിനിമയുടെ അണിയറപ്രവര്‍ത്തകരും, അതിനാല്‍ ഐപിസി പ്രകാരവും ഐടി പ്രിവന്‍ഷന്‍ ആക്ട് പ്രകാരവും വിക്രം, സംവിധായകന്‍, ഛായാഗ്രാഹകന്‍ എന്നിവര്‍ക്കെതിരെ നടപടി എടുക്കണമെന്നാണ് സെല്‍വത്തിന്റെ പരാതിയില്‍ പറയുന്നത്.
‘ചിത്ത’ എന്ന ചിത്രത്തിന് ശേഷം അരുണ്‍കുമാര്‍ സംവിധാനം ചെയ്യുന്ന ചിത്രമാണ് വീര ധീര ശൂര. ചിത്രത്തിന്റെ ഷൂട്ടിംഗ് തമിഴ്നാടിന്റെ വിവിധ ഭാഗങ്ങളിലായി ആരംഭിച്ചു കഴിഞ്ഞു. ആക്ഷന്‍ ത്രില്ലര്‍ ചിത്രമാണ്. എസ് ജെ സൂര്യയും മലയാളി താരങ്ങളായ സുരാജ് വെഞ്ഞാറമൂടും സിദ്ദിഖും ചിത്രത്തില്‍ പ്രധാന കഥാപാത്രങ്ങളായെത്തുന്നുണ്ട്. ദുഷാര വിജയന്‍ ആണ് ചിത്രത്തിലെ നായിക.
