ടൊവിനോ നായകനായ തല്ലുമാല ആരാധകര് ഇരുകൈയ്യും നീട്ടി സ്വീകിരിച്ചിരിക്കുകയാണ്. മികച്ച റിപ്പോര്ട്ടുകളാണ് ബോക്സ് ഓഫീസില് നിന്നും തല്ലുമാല നേടുന്നത്. ചിത്രത്തില് ശ്രദ്ധേയമായ റോള് ചെയ്ത താരമാണ് ലുഖ്മാന് അവറാന്. തല്ലുമാലയിലെ ജംഷിയ്ക്ക് മികച്ച അഭിപ്രായമാണ് നേടിയത്. ചെറിയ വേഷങ്ങളില് അഭിനയം തുടങ്ങിയ ലുഖ്മാന് നായകനായത് തരുണ്മൂര്ത്തിയുടെ ഓപ്പറേഷന് ജാവയിലാണ്.
തരുണ് മൂര്ത്തിയുടെ രണ്ടാം സിനിമയായ സൗദി വെള്ളക്കയിലും ലുഖ്മാന് ആയിരുന്നു നായകന്. ലുഖ്മാനെ നായകനാക്കിയതിനെതിരെ പലരും തന്നെ വിമര്ശിച്ചിരുന്നെന്ന് തുറന്നുപറയുകയാണ് തരുണ് മൂര്ത്തി.
ലുക്മാന് എന്ന നടനിലേക്ക് പ്രേക്ഷകര് അടുക്കുന്നതു കാണുമ്പോള് ഒരു പാട് സന്തോഷമുണ്ട് അതിലേറെ അഭിമാനവും…ആവേശമുണ്ടെന്ന് തരുണ് പറയുന്നു.
ഉണ്ടയും, ജാവയും, തല്ലുമാലയും എല്ലാം നെയ്തെടുക്കുന്നത് ഒരു നടനെ മാത്രം അല്ല.. നടനാകാന് കൊതിക്കുന്ന ശ്രമിക്കുന്ന ഒരു കൂട്ടം ആളുകളുടെ സ്വപ്നം കൂടിയാണ് എന്ന സന്തോഷം, ആവേശവുമാണ്.
പണ്ട് ഒരുമിച്ച് ഓഡിഷനുകളില് പങ്കെടുക്കാന് പോയ പരിചയം മാത്രമേ ലുക്മാനും ഞാനും തമ്മില് ഉണ്ടായിരുന്നുള്ളൂ.. പക്ഷെ ആദ്യ സിനിമ ചെയ്യാന് തീരുമാനിച്ചപ്പോള് അവനേ നായകന്മാരില് ഒരാളാക്കാന് എന്നെ തോന്നിച്ചത് എന്താണെന്ന് എനിക്കറിയില്ല.. അത് എന്തിനാണെന്നും അറിയില്ല… ഓപ്പറേഷന് ജാവയില് വിനയ ദാസന് ആയി കൂടെ കൂട്ടുമ്പോള് ഞങ്ങള് രണ്ടാളും അറിഞ്ഞിരുന്നില്ല ഇതൊരു വലിയ യാത്രയുടെ തുടക്കമാണെന്ന് തരുണ് പറയുന്നു.
ജാവ വിജയം ആയിരുന്നെങ്കിലും രണ്ടാം സിനിമയായ സൗദി വെള്ളക്കയിലും ലുക്മാനാണ് നായകന് എന്നറിഞ്ഞപ്പോള് പരാതി പറഞ്ഞവരുണ്ട്, അതെന്റെ അഹങ്കാരമാണെന്ന് പറഞ്ഞവരുണ്ട് അവരോടൊക്കെ പറയാനുള്ളത് ഇതാണ്.. അഹങ്കാരമല്ല മറിച്ച് അഭിമാനമാണെന്ന് തരുണ് ഫേസ്ബുക്കില് കുറിച്ചു.
കഥാപാത്രത്തിന് ചേര്ന്ന മുഖങ്ങള് കണ്ടെത്താന് പറ്റുന്നത്. അവരോടൊത്ത് സിനിമ ചെയ്യാന് പറ്റുന്നത്… അതിന്റെ ഓരോ പുരോഗതിയും കാണാന് പറ്റുന്നത്. കാരണം സിനിമയെന്നത് ഞങ്ങള്ക്ക് കച്ചവടം മാത്രമല്ല.. കലയും കൂടിയാണ്.
ബിനു ചേട്ടനും, ഗോകുലനും, രമ്യ സുരേഷും, നില്ജയും, ധന്യയും, സജീദ് പട്ടാളവും, വിന്സിയും, റിയ സൈറയും, പ്രമോദ് വെളിയനാടും, സുജിത് ശങ്കറും എല്ലാം അസാമാന്യ ജീവിതാനുഭവമുള്ളവരാണ്… ആ ജീവിതാനുഭവം ഉള്ളത് കൊണ്ടാണ് സ്ക്രീനില് അവര് നിങ്ങളെ അത്ഭുതപ്പെടുത്തുന്നത്…
ചങ്ങരംകുളത്ത് നിന്നും സിനിമയിലേക്ക് ലുകുമാന്, നീ നടന്നു തീര്ത്ത വഴികള് അത്ര എളുപ്പമുള്ളതായിരുന്നില്ല എന്ന് എനിക്കറിയാം,..പ്രതിസന്ധികളെ തരണം ചെയ്ത നായകനായ നീ തുറന്നിടുന്നത് ഒരു വലിയ വാതിലാണ്… നമ്മളെപ്പോലെ സിനിമ കൊതിച്ചു നടന്ന ഒരുപാട് പേര്ക്കുള്ള പ്രതീക്ഷയുടെ വാതിലാണെന്നും തരുണ് കുറിച്ചു.