ആം ആദ്മി പാർട്ടി ഉപേക്ഷിച്ച് ബിജെപിയിൽ ചേർന്ന ഏഴ് രാജ്യസഭാ എംപിമാരെ അയോഗ്യരാക്കണമെന്ന് ആവശ്യപ്പെട്ട് രാജ്യസഭാ അധ്യക്ഷനും ഉപരാഷ്ട്രപതിയുമായ ജഗ്ദീപ് ധൻകറിന് കത്ത് നൽകാൻ എഎപി തീരുമാനിച്ചു. പാർട്ടിയുടെ രാജ്യസഭയിലെ അംഗബലം പത്തിൽ നിന്ന് മൂന്നായി കുറഞ്ഞത് വലിയ രാഷ്ട്രീയ പ്രതിസന്ധിയാണ് സൃഷ്ടിച്ചിരിക്കുന്നത്. ഈ കൂറുമാറ്റം ഭരണഘടനാ വിരുദ്ധവും നിയമവിരുദ്ധവുമാണെന്ന് മുതിർന്ന എഎപി നേതാവ് സഞ്ജയ് സിംഗ് വ്യക്തമാക്കി.
ഭരണഘടനയുടെ പത്താം ഷെഡ്യൂൾ പ്രകാരം (Anti-Defection Law) എംപിമാരുടെ അംഗത്വം റദ്ദാക്കണമെന്നാണ് എഎപിയുടെ ആവശ്യം. രാഘവ് ഛദ്ദ, സന്ദീപ് പഥക്, ഹർഭജൻ സിംഗ്, സ്വാതി മലിവാൾ ഉൾപ്പെടെയുള്ള ഏഴ് എംപിമാരാണ് ബിജെപിയിൽ ചേർന്നത്. മൂന്നിൽ രണ്ട് ഭാഗം അംഗങ്ങൾ പാർട്ടി വിട്ടാലും രാജ്യസഭയിലോ നിയമസഭയിലോ അത്തരം മാറ്റങ്ങൾക്ക് നിയമസാധുതയില്ലെന്നും, ഇത് കൂറുമാറ്റ നിരോധന നിയമത്തിന്റെ ലംഘനമാണെന്നും എഎപി വാദിക്കുന്നു.
പഞ്ചാബിലെ ഭഗവന്ത് മാൻ സർക്കാരിന്റെ ജനക്ഷേമ പ്രവർത്തനങ്ങൾ തടസ്സപ്പെടുത്താൻ ബിജെപി നടത്തുന്ന ‘ഓപ്പറേഷൻ താമര’യുടെ ഭാഗമാണ് ഈ നീക്കമെന്ന് എഎപി ദേശീയ കൺവീനർ അരവിന്ദ് കെജ്രിവാൾ ആരോപിച്ചു. അന്വേഷണ ഏജൻസികളെ ഉപയോഗിച്ച് ഭീഷണിപ്പെടുത്തിയാണ് എംപിമാരെ അടർത്തിയെടുത്തതെന്നും പാർട്ടി ആരോപിക്കുന്നു. എന്നാൽ, രണ്ട് വർഷത്തോളമായി പാർട്ടി നേതൃത്വവുമായി അകന്നു കഴിയുന്ന രാഘവ് ഛദ്ദ ഉൾപ്പെടെയുള്ളവർ സ്വമേധയാ പാർട്ടി വിട്ടതാണെന്നാണ് ബിജെപിയുടെ നിലപാട്.
