ബ്രഹ്മാണ്ഡ സംവിധായകൻ എസ്.എസ്. രാജമൗലിയുടെ ഏറ്റവും പുതിയ ചിത്രമായ ‘വാരണാസി’യെക്കുറിച്ചുള്ള വെളിപ്പെടുത്തലുകൾ സിനിമാലോകത്ത് ശ്രദ്ധനേടുന്നു. തന്റെ എല്ലാ സിനിമകളും ഭഗവാൻ ശ്രീരാമനിൽ നിന്നും രാമായണത്തിൽ നിന്നും പ്രചോദനം ഉൾക്കൊണ്ടാണ് നിർമ്മിച്ചിട്ടുള്ളതെന്ന് രാജമൗലി വ്യക്തമാക്കി. തന്റെ പുതിയ പ്രൊജക്റ്റായ ‘വാരണാസി’യിൽ രാമായണത്തിലെ ഒരു പ്രധാന ഘട്ടം നേരിട്ട് ഉൾപ്പെടുത്താൻ അവസരം ലഭിച്ചതായും അന്താരാഷ്ട്ര മാധ്യമത്തിന് നൽകിയ അഭിമുഖത്തിൽ അദ്ദേഹം വെളിപ്പെടുത്തി.
മഹേഷ് ബാബു നായകനാകുന്ന ഈ ചിത്രം ഒരു ടൈം ട്രാവൽ അഡ്വഞ്ചർ ആണെങ്കിലും ഇതിന്റെ ആത്മാവ് മനുഷ്യബന്ധങ്ങളാണെന്ന് സംവിധായകൻ പറയുന്നു. രാമനും ദശരഥനും തമ്മിലുള്ള വൈകാരിക ബന്ധത്തിന് സമാനമായ അച്ഛൻ-മകൻ ബന്ധമാണ് സിനിമയുടെ കാതൽ. പുരാണങ്ങളെക്കുറിച്ച് ആഴത്തിൽ അറിവില്ലാത്തവർക്കും കഥാപാത്രങ്ങളുടെ വികാരങ്ങളിലൂടെ സിനിമ എളുപ്പത്തിൽ മനസ്സിലാക്കാൻ സാധിക്കുന്ന രീതിയിലാണ് ഇതിന്റെ ആഖ്യാനം നിർവ്വഹിച്ചിരിക്കുന്നത്.
ആഫ്രിക്ക, അമേരിക്ക, ഇന്ത്യ എന്നിവിടങ്ങളിലായി ചിത്രീകരണം പൂർത്തിയാക്കുന്ന ഈ ചിത്രം ഏകദേശം 1000 കോടിയിലധികം ബജറ്റിലാണ് ഒരുങ്ങുന്നത്. പൃഥ്വിരാജ് സുകുമാരൻ ‘കുംഭ’ എന്ന ശക്തനായ വില്ലൻ വേഷത്തിലെത്തുമ്പോൾ, പ്രിയങ്ക ചോപ്ര ‘മന്ദാകിനി’ എന്ന കഥാപാത്രത്തെ അവതരിപ്പിക്കുന്നു. ഐമാക്സ് (IMAX) ഫോർമാറ്റിൽ പുറത്തിറങ്ങുന്ന ചിത്രം 2027 ഏപ്രിൽ 7-ന് ആഗോളതലത്തിൽ റിലീസ് ചെയ്യുമെന്നാണ് അണിയറപ്രവർത്തകർ അറിയിച്ചിരിക്കുന്നത്.
