സോഷ്യല് മീഡിയയില് കൂടി ഒരുപാട് ബോഡിഷെയിമിങ് കമന്റുകള് നേരിട്ടുകൊണ്ടിരിക്കുന്ന നടിയാണ് അപര്ണ ബാലമുരളി. തടി വച്ചല്ലോ, അവസരങ്ങള് കിട്ടില്ല, എന്താണിങ്ങനെ തടിച്ചത് എന്നൊക്കെ ചോദിച്ച് ഒരുപാട് കമന്റുകള് നടിയുടെ ഇന്സ്റ്റഗ്രാം പേജിലും ഇന്ബോക്സിലും എല്ലാം എത്തുന്നുണ്ട്. ഒപ്പം നേരിട്ട് ചോദിക്കുന്നവരുമുണ്ട്.
എന്നാല് അതൊന്നും താന് കാര്യമാക്കാറില്ല എന്നാണ് അപര്ണ പറയുന്നത്. കോളേജില് പഠിക്കുന്ന കാലത്ത് നന്നായി മെലിഞ്ഞിട്ടായിരുന്നു താന്. കഴുത്തിലെ എല്ല് എല്ലാം കാണുമ്പോള് ഒരുപാട് കളിയാക്കലുകള് കേട്ടിട്ടുണ്ട്. അച്ചിലിട്ട് വാര്ത്തെടുത്തതാണോ എന്നൊക്കെ ചോദിച്ചിരുന്നു. ഇപ്പോള് തടി വച്ചപ്പോള് ഇങ്ങനെ. രണ്ട് തരവും താന് കേട്ടു, അപ്പോള് മുതലേ ശീലമായതുകൊണ്ട് ഇപ്പോള് ഇതിനെ അത്ര കാര്യമാക്കുന്നില്ല.
പക്ഷേ എന്തൊക്കെ പറഞ്ഞാലും വണ്ണം വയ്ക്കുന്നത് ആരോഗ്യത്തിന് പ്രശ്നമാണ് എന്ന് തോന്നുമ്പോള് ഒരു ശ്രമം നടത്തുമല്ലോ. അങ്ങനെ ചെയ്യാറുണ്ട്. ഇടയ്ക്ക് ജിമ്മിലൊക്കെ പോകാറുണ്ട്. പക്ഷേ തുടര്ച്ചയായി അത് പാലിക്കാന് കഴിയുന്നില്ല. പുറത്തുന്നുള്ള ഭക്ഷണവും ലൈഫ് സ്റ്റൈലും എല്ലാം വണ്ണം വയ്ക്കുന്നതിന് കാരണമാണ്. പക്ഷേ ഇങ്ങനെ പോയാല് ശരീരം പണി തരും എന്ന് തനിക്കറിയാം.
ചിലപ്പോള് ചിന്തിക്കുമ്പോള്, ഇപ്പോള് ഇങ്ങനെ അങ്ങ് പോകട്ടെ, കുറച്ചുകൂടെ കഴിഞ്ഞ് നോക്കാം എന്ന് തോന്നും. കഴിഞ്ഞവര്ഷം നാച്വറല്പതി ട്രീറ്റ്മെന്റ് എടുത്തിരുന്നു. അവിടെ പഴങ്ങളും പച്ചക്കറികളും മാത്രം കഴിച്ച് കുറച്ചു നാള് നോക്കിയിരുന്നു. നല്ല മാറ്റം തോന്നുകയും ചെയ്തു. പക്ഷേ പിന്നെ താന് ചിന്തിച്ചു, നാളെ തനിക്കെന്തെങ്കിലും സംഭവിച്ചാല്, താന് മരിച്ചു പോവുകയെങ്ങാനും ചെയ്താല് ഇത് കഴിച്ചായിരിക്കുമോ താന് പോകുന്നേ എന്ന് ചിന്തിച്ചപ്പോള് തനിക്ക് കരച്ചിലൊക്കെ വന്ന് കരഞ്ഞിട്ടുണ്ട് എന്നും അപർണ പറയുന്നു. അപ്പോള് നന്നായി ഫുഡ് കഴിക്കും. കുഴിമന്തിയും മില്ക് മേഡുമൊക്കെയാണ് കഴിക്കാന് തനിക്കിഷ്ടമുള്ള ഭക്ഷണങ്ങൾ എന്നും അപര്ണ ബാലമുരളി പറയുന്നു.
