അർബുദ ബാധിതയായി അന്തരിച്ച തന്റെ പ്രിയ ശിഷ്യ ജയശ്രീയെക്കുറിച്ച് ഹൃദയസ്പർശിയായ കുറിപ്പുമായി നടി ആശ ശരത്ത്. രോഗാവസ്ഥയുടെ കഠിനമായ വേദനകൾക്കിടയിലും നൃത്തത്തോടുള്ള അടങ്ങാത്ത അഭിനിവേശവുമായി ചിലങ്കയണിഞ്ഞ ജയശ്രീയുടെ വിയോഗം തനിക്ക് താങ്ങാനാവുന്നതിലും അപ്പുറമാണെന്ന് ആശ ശരത്ത് തന്റെ സോഷ്യൽ മീഡിയ പോസ്റ്റിൽ കുറിച്ചു.
കാസർകോട് എൻമകജെയിൽ അസിസ്റ്റന്റ് കൃഷി ഓഫീസറായിരുന്ന ജയശ്രീ, എറണാകുളത്തെ സ്വകാര്യ ആശുപത്രിയിൽ വെച്ചാണ് അന്തരിച്ചത്. ഒരു വനിതാ ദിനത്തിലായിരുന്നു ജയശ്രീ ആശ ശരത്തിന്റെ ശിഷ്യയായി നൃത്തം പഠിക്കാനെത്തിയത്. രോഗം ശരീരത്തെ തളർത്തുമ്പോഴും മനസ്സിലെ നർത്തകിയെ തളരാതെ കാത്ത ജയശ്രീ, സ്ത്രീശക്തിയുടെ പ്രതീകമാണെന്നും നടി അനുസ്മരിച്ചു.
ഗുരുവായൂരപ്പന്റെ സന്നിധിയിൽ വെച്ച് നൃത്തം അവതരിപ്പിക്കണമെന്നത് ജയശ്രീയുടെ വലിയൊരു ആഗ്രഹമായിരുന്നു. ആ മോഹം പൂവണിഞ്ഞ ദിവസം അവളുടെ കണ്ണുകളിൽ കണ്ട സന്തോഷം ഒരു വലിയ ദീപം പോലെ തന്റെ മനസ്സിലുണ്ടാകുമെന്ന് ആശ ശരത്ത് പറയുന്നു. ഓരോ ചുവടിലും വേദന അനുഭവപ്പെട്ടപ്പോഴും “എനിക്ക് കഴിയില്ല” എന്ന് പറയാൻ ജയശ്രീ തയാറായിരുന്നില്ല.
വേദനകളില്ലാത്ത ലോകത്തേക്ക് ജയശ്രീ യാത്രയായെങ്കിലും, അവിടത്തെ മണ്ണിലും അവളുടെ ചിലങ്കയുടെ ശബ്ദം മുഴങ്ങുന്നുണ്ടാകുമെന്ന് ആശ ശരത്ത് കുറിച്ചു. ശ്വാസമുള്ളിടത്തോളം കാലം ജയശ്രീ തനിക്ക് ഒരു നൊമ്പരവും അഭിമാനവുമായിരിക്കുമെന്നും പറഞ്ഞാണ് താരം തന്റെ കുറിപ്പ് അവസാനിപ്പിക്കുന്നത്.
