ഇറാനിലെ ഇസ്ലാമിക റിപ്പബ്ലിക്കിന്റെ സ്ഥാപകനും ലോകം കണ്ട ഏറ്റവും വലിയ വിപ്ലവകാരികളിൽ ഒരാളുമായ ആയത്തുല്ല റൂഹുല്ല മുസവി ഖുമൈനിയുടെ ഇന്ത്യൻ വേരുകൾ വീണ്ടും ചർച്ചയാകുന്നു. ഖുമൈനിയുടെ പൂർവികർക്ക് ഉത്തർപ്രദേശിലെ ഒരു ചെറിയ ഗ്രാമവുമായുള്ള ആഴത്തിലുള്ള ബന്ധത്തെക്കുറിച്ചുള്ള വിവരങ്ങളാണ് ഇപ്പോൾ പുറത്തുവരുന്നത്. വിപ്ലവ നേതാവിന്റെ മുത്തച്ഛൻ സെയ്ദ് അഹ്മദ് മുസവി ഹിന്ദി ജനിച്ചതും വളർന്നതും ഉത്തർപ്രദേശിലെ ബാരാബങ്കി ജില്ലയിലുള്ള കിന്തൂർ എന്ന ഗ്രാമത്തിലാണെന്നാണ് ചരിത്രരേഖകൾ വ്യക്തമാക്കുന്നത്.
പതിനെട്ടാം നൂറ്റാണ്ടിന്റെ അവസാനത്തിൽ ലഖ്നൗവിലെ അവധ് രാജവംശവുമായി ബന്ധപ്പെട്ട് പ്രവർത്തിച്ചിരുന്ന പണ്ഡിത കുടുംബമായിരുന്നു ഖുമൈനിയുടേത്. അദ്ദേഹത്തിന്റെ മുത്തച്ഛൻ സെയ്ദ് അഹ്മദ് ലഖ്നൗവിൽ നിന്ന് ഇറാഖിലെ നജാഫിലേക്കും പിന്നീട് ഇറാനിലെ ഖുമൈനിലേക്കും കുടിയേറുകയായിരുന്നു. ഖുമൈനിയുടെ കുടുംബപ്പേരിലെ ‘ഹിന്ദി’ എന്ന ഭാഗം അദ്ദേഹത്തിന്റെ ഇന്ത്യൻ പാരമ്പര്യത്തെയാണ് സൂചിപ്പിക്കുന്നത്. ഇറാനിലെത്തിയ ശേഷവും തന്റെ ഇന്ത്യൻ ബന്ധത്തെ അദ്ദേഹം ആദരവോടെ കണ്ടിരുന്നുവെന്നാണ് പറയപ്പെടുന്നത്.
ഇറാൻ-ഇസ്രയേൽ സംഘർഷങ്ങളുടെ പശ്ചാത്തലത്തിൽ ഇറാൻ പരമോന്നത നേതാവ് ആയത്തുല്ല അലി ഖമനയി കൊല്ലപ്പെട്ടുവെന്ന വാർത്തകൾ പുറത്തുവരുന്നതിനിടെയാണ്, വിപ്ലവത്തിന്റെ സ്ഥാപകനായ ഖുമൈനിയുടെ ഇന്ത്യൻ ബന്ധവും ശ്രദ്ധേയമാകുന്നത്. ലഖ്നൗവിലെ ഷിയാ പണ്ഡിതന്മാർക്കിടയിൽ ഇന്നും ഖുമൈനി കുടുംബത്തിന്റെ ഇന്ത്യൻ വേരുകളെക്കുറിച്ചുള്ള കഥകൾ സജീവമാണ്. ഒരു വിദേശ രാജ്യത്തെ മാറ്റിമറിച്ച വിപ്ലവത്തിന്റെ വിത്തുകൾ ഒരുപക്ഷേ ഉത്തർപ്രദേശിലെ ഈ ചെറിയ ഗ്രാമത്തിൽ നിന്നാകാം തുടങ്ങിയതെന്ന കൗതുകകരമായ വസ്തുതയാണ് ഈ റിപ്പോർട്ട് പങ്കുവെക്കുന്നത്.
