മലയാള സിനിമയിലെ എക്കാലത്തെയും വലിയ പ്രണയവിസ്മയമായ ‘അനിയത്തിപ്രാവ്’ റിലീസ് ചെയ്തിട്ട് ഇന്ന് 29 വർഷം തികയുന്നു. ഈ സുദിനത്തിൽ ചിത്രത്തിന്റെ സംവിധായകൻ ഫാസിലിനെ നേരിൽ കണ്ട് സ്നേഹം പങ്കുവെച്ചിരിക്കുകയാണ് താരം കുഞ്ചാക്കോ ബോബൻ. 1997 മാർച്ച് 26-നാണ് ഈ ചിത്രം തിയേറ്ററുകളിൽ എത്തിയത്. തന്റെ സിനിമാ ജീവിതത്തിന് തുടക്കം കുറിച്ച പ്രിയപ്പെട്ട ‘പാച്ചിക്കയ്ക്കൊപ്പമുള്ള’ (ഫാസിൽ) സെൽഫി സോഷ്യൽ മീഡിയയിൽ പങ്കുവെച്ചുകൊണ്ടാണ് ചാക്കോച്ചൻ ഈ ഓർമ്മ പുതുക്കിയത്.മലയാളികളുടെ ചോക്ലേറ്റ് ഹീറോയായി കുഞ്ചാക്കോ ബോബനെ മാറ്റിയ ‘അനിയത്തിപ്രാവ്’ അക്കാലത്തെ വലിയ ഇൻഡസ്ട്രി ഹിറ്റുകളിൽ ഒന്നായിരുന്നു. സുധിയായും മിനിയായും എത്തിയ ചാക്കോച്ചനെയും ശാലിനിയെയും മലയാളികൾ ഇരുകയ്യും നീട്ടിയാണ് സ്വീകരിച്ചത്. ചിത്രത്തിലെ ഗാനങ്ങളും സംഭാഷണങ്ങളും ഇന്നും മലയാളികൾക്കിടയിൽ തരംഗമാണ്. അനിയത്തിപ്രാവിന്റെ വാർഷികത്തോടൊപ്പം കുഞ്ചാക്കോ ബോബൻ തന്റെ അഭിനയ ജീവിതത്തിന്റെ 29-ാം വർഷത്തിലേക്കും കടക്കുകയാണ്.”എന്റെ പാച്ചിക്കയ്ക്കൊപ്പം…” എന്ന അടിക്കുറിപ്പോടെ പങ്കുവെച്ച ചിത്രം ഇതിനോടകം തന്നെ ആരാധകർ ഏറ്റെടുത്തു കഴിഞ്ഞു. വർഷങ്ങൾക്കിപ്പുറവും അനിയത്തിപ്രാവിനോടും സുധിയോടും കാണിക്കുന്ന സ്നേഹത്തിന് ചാക്കോച്ചൻ പ്രേക്ഷകർക്ക് നന്ദി അറിയിച്ചു. മലയാള സിനിമയിൽ നിരവധി മാറ്റങ്ങൾ സംഭവിച്ചിട്ടും അനിയത്തിപ്രാവ് നൽകിയ ആ പഴയ പ്രണയകാലത്തിന്റെ ഓർമ്മകൾ ഇന്നും പ്രേക്ഷകർക്ക് പ്രിയപ്പെട്ടതാണ്.
