കൊച്ചി: മലയാള സിനിമയിലെ ഇതിഹാസ താരം ശ്രീനിവാസന്റെ വിയോഗത്തിൽ അഗാധമായ ദുഃഖം രേഖപ്പെടുത്തി നടൻ ദുൽഖർ സൽമാൻ. ശ്രീനിവാസന്റെ കുടുംബത്തെ സ്വന്തം കുടുംബത്തെപ്പോലെയാണ് താൻ കാണുന്നതെന്നും അദ്ദേഹത്തോടൊപ്പം പ്രവർത്തിക്കാൻ ലഭിച്ച അവസരങ്ങൾ എന്നും വിലമതിക്കുന്നതായും ദുൽഖർ പറഞ്ഞു.
“ശ്രീനിയങ്കിൾ, നിങ്ങളിലെ വെളിച്ചം എല്ലാക്കാലവും നിലനിൽക്കും,” എന്ന് ദുൽഖർ തന്റെ അനുസ്മരണക്കുറിപ്പിൽ കുറിച്ചു. സിനിമയിലെ അഭിനയ മികവിനും എഴുത്തിനും അപ്പുറം വ്യക്തിപരമായി തനിക്ക് വലിയൊരു അടുപ്പമുണ്ടായിരുന്ന വ്യക്തിയായിരുന്നു അദ്ദേഹം. മമ്മൂട്ടിയും ശ്രീനിവാസനും തമ്മിലുള്ള പതിറ്റാണ്ടുകൾ നീണ്ട സൗഹൃദം മൂലം ദുൽഖറിന് ശ്രീനിവാസൻ വെറുമൊരു സഹപ്രവർത്തകനായിരുന്നില്ല, മറിച്ച് കുടുംബത്തിലെ ഒരു മുതിർന്ന അംഗമായിരുന്നു.
ശ്രീനിവാസന്റെ വിയോഗവാർത്ത അറിഞ്ഞയുടൻ സോഷ്യൽ മീഡിയയിലൂടെയാണ് ദുൽഖർ തന്റെ ആദരാഞ്ജലികൾ അർപ്പിച്ചത്. മലയാള സിനിമയ്ക്ക് ശ്രീനിവാസൻ നൽകിയ സംഭാവനകൾ സമാനതകളില്ലാത്തതാണെന്നും അദ്ദേഹത്തിന്റെ സിനിമകൾ വരും തലമുറകൾക്കും വഴികാട്ടിയായിരിക്കുമെന്നും ദുൽഖർ കൂട്ടിച്ചേർത്തു.
ശ്രീനിവാസന്റെ മക്കളായ വിനീതിനും ധ്യാനിനും കുടുംബത്തിനുമുണ്ടായ ഈ തീരാനഷ്ടത്തിൽ ദുൽഖർ പങ്കുചേർന്നു. മലയാള സിനിമയിലെ ഒരു വലിയ അധ്യായം അവസാനിക്കുമ്പോൾ, അദ്ദേഹം പകർന്നുനൽകിയ ചിരിയും ചിന്തയും എന്നും പ്രേക്ഷകമനസ്സുകളിൽ ജീവിക്കുമെന്ന് താരം ഓർമ്മിപ്പിച്ചു.
