‘അക്ക’ സിനിമയുടെ പ്രമോഷനിടെ നടി രാധിക ആപ്തെ നടത്തിയ വിവാദ പരാമർശവും അതിനോടുള്ള തന്റെ പ്രതികരണവും സംബന്ധിച്ച് വിശദീകരണവുമായി നടി കീർത്തി സുരേഷ്. താൻ ഒരിക്കലും ദക്ഷിണേന്ത്യൻ സംസ്കാരത്തെ അപമാനിച്ച് സംസാരിച്ചിട്ടില്ലെന്നും രാധികയുടെ വാക്കുകൾ തുടക്കത്തിൽ കൃത്യമായി മനസ്സിലാക്കാൻ സാധിച്ചില്ലെന്നുമാണ് കീർത്തിയുടെ വിശദീകരണം. പുതിയ ചിത്രമായ ‘സത്യവാൻ സാവിത്രി’യുടെ വാർത്താസമ്മേളനത്തിനിടെയാണ് താരം ഇക്കാര്യം വ്യക്തമാക്കിയത്.
തെലുങ്ക് സിനിമയിൽ അഭിനയിക്കുന്നതിനിടെ അമ്മാവനെ പ്രണയിക്കേണ്ട സാഹചര്യമുണ്ടായതിനെക്കുറിച്ചായിരുന്നു രാധിക ആപ്തെയുടെ പരാമർശം. ഇതിനെ ദക്ഷിണേന്ത്യൻ സംസ്കാരവുമായി ബന്ധപ്പെടുത്തി സംസാരിച്ചതാണ് വിവാദമായത്. പരാമർശം ദക്ഷിണേന്ത്യൻ സംസ്കാരത്തെ അപമാനിക്കുന്നതാണെന്ന് ചൂണ്ടിക്കാട്ടി നിരവധി പേർ വിമർശനവുമായി രംഗത്തെത്തിയിരുന്നു.
സംഭവസമയത്ത് കേരളത്തിൽ അത്തരമൊരു സംസ്കാരമില്ലെന്ന് കീർത്തി സുരേഷ് പ്രതികരിച്ചതും ചർച്ചയായിരുന്നു. എന്നാൽ രാധികയുടെ പരാമർശത്തെ തിരുത്താൻ കീർത്തി തയ്യാറായില്ലെന്നും സഹനടിയെന്ന നിലയിൽ പിന്തുണച്ചെന്നുമായിരുന്നു ചില ആരാധകരുടെ വിമർശനം. ഇതിന് മറുപടിയായാണ് താരം ഇപ്പോൾ വിശദീകരണവുമായി എത്തിയത്.
രാധിക സംസാരിച്ചുതുടങ്ങിയപ്പോൾ അവർ ഉദ്ദേശിച്ചത് എന്താണെന്ന് തനിക്ക് മനസ്സിലായില്ലെന്ന് കീർത്തി പറഞ്ഞു. അമ്മാവനെ പ്രണയിക്കേണ്ടി വന്നുവെന്ന് അവർ ആദ്യം പറഞ്ഞപ്പോൾ വിഷയം വ്യക്തമായിരുന്നില്ലെന്നും പിന്നീട് ദക്ഷിണേന്ത്യൻ സംസ്കാരത്തെക്കുറിച്ചാണ് സംസാരിക്കുന്നതെന്ന് മനസ്സിലായെന്നും താരം വ്യക്തമാക്കി.
‘കേരളത്തിൽ അത്തരമൊരു സംസ്കാരമില്ലെന്ന് പറഞ്ഞത് എന്റെ അറിവിലുള്ള കാര്യം പങ്കുവെക്കുക മാത്രമായിരുന്നു. എന്റെ അറിവിൽ അമ്മാവന്മാരെ വിവാഹം കഴിക്കുന്ന രീതി കേരളത്തിലില്ല. മുറൈമാമൻ തിരുമണം തമിഴ്നാട്ടിലും ആന്ധ്രയിലുമാണ് നിലവിലുള്ളതെന്നാണ് എനിക്കറിയാവുന്നത്. കർണാടകയിലെ കാര്യം എനിക്ക് വ്യക്തമായി അറിയില്ല. അത് പറഞ്ഞുകൊടുക്കാനാണ് ഞാൻ ശ്രമിച്ചത്,’ കീർത്തി വിശദീകരിച്ചു.
ദക്ഷിണേന്ത്യൻ സംസ്കാരത്തെ തരംതാഴ്ത്തി സംസാരിക്കാൻ തനിക്ക് ഒരിക്കലും ഉദ്ദേശ്യമുണ്ടായിരുന്നില്ലെന്നും അങ്ങനെ ചെയ്യില്ലെന്നും താരം കൂട്ടിച്ചേർത്തു. രാധികയുടെ പരാമർശത്തിൽ ഉണ്ടായ ആശയക്കുഴപ്പമാണ് അന്നത്തെ പ്രതികരണത്തിന് പിന്നിലെന്നും കീർത്തിയുടെ വിശദീകരണത്തോടെ വിവാദം വീണ്ടും ചർച്ചയായിരിക്കുകയാണ്.
