ലോകമെമ്പാടും ആരാധകരുള്ള ക്രൈം ഡ്രാമ വെബ് സീരീസായ ‘ട്രൂ ഡിറ്റക്റ്റീവ്’ അഞ്ചാം സീസണുമായി തിരിച്ചെത്തുന്നു. ഹോളിവുഡ് താരം നിക്കോളാസ് കേജും സ്പാനിഷ് നടൻ അന്റോണിയോ ബാണ്ടെരസുമാണ് പുതിയ സീസണിൽ പ്രധാന കഥാപാത്രങ്ങളെ അവതരിപ്പിക്കുന്നത്. എച്ച്ബിഒ മാക്സാണ് പുതിയ സീസണിലെ താരങ്ങളെക്കുറിച്ചുള്ള വിവരങ്ങൾ പുറത്തുവിട്ടത്. അഞ്ചാം സീസണിന്റെ ചിത്രീകരണം 2027ൽ ആരംഭിക്കുമെന്നാണ് റിപ്പോർട്ടുകൾ.
2024ൽ പുറത്തിറങ്ങിയ നാലാം സീസണായ ‘നൈറ്റ് കൺട്രി’യുടെ ഷോറണ്ണറായ ഇസ ലോപ്പസ് തന്നെയാണ് അഞ്ചാം സീസണിന്റെയും ചുമതല വഹിക്കുന്നത്. പുതിയ സീസണിന്റെ കഥാപശ്ചാത്തലത്തെക്കുറിച്ചുള്ള ചില വിവരങ്ങൾ മാത്രമാണ് ഇതുവരെ പുറത്തുവന്നിട്ടുള്ളത്. ന്യൂയോർക്കിലെ ജമൈക്ക ബേയിലാണ് അഞ്ചാം സീസണിന്റെ കഥ നടക്കുന്നത്. അന്റോണിയോ ബാണ്ടെരസ് റായ് ഗാർസിയ എന്ന കഥാപാത്രത്തെയും നിക്കോളാസ് കേജ് ഹെൻറി ലോഗൻ എന്ന കഥാപാത്രത്തെയും അവതരിപ്പിക്കും.
ആന്തോളജി വിഭാഗത്തിൽപ്പെടുന്ന ‘ട്രൂ ഡിറ്റക്റ്റീവ്’ ഓരോ സീസണിലും വ്യത്യസ്ത കഥകളും പുതിയ കഥാപാത്രങ്ങളുമായാണ് എത്തുന്നത്. 2014ൽ പുറത്തിറങ്ങിയ ആദ്യ സീസണിൽ മാത്യു മക്കോണഹേ, വുഡി ഹാരെൽസൺ, മിഷേൽ മൊണഗൻ, മൈക്കൽ പോട്ട്സ് എന്നിവർ പ്രധാന വേഷങ്ങളിലെത്തി. ലൂസിയാനയിലെ പൊലീസ് ഉദ്യോഗസ്ഥർ ഒരു സീരിയൽ കില്ലറെ കണ്ടെത്താൻ നടത്തുന്ന അന്വേഷണമായിരുന്നു ആദ്യ സീസണിന്റെ പ്രമേയം.
2015ൽ പുറത്തിറങ്ങിയ രണ്ടാം സീസണിൽ കോളിൻ ഫാരെൽ, റേച്ചൽ മക്ആഡംസ്, ടെയ്‌ലർ കിച്ച് എന്നിവർ പ്രധാന കഥാപാത്രങ്ങളെ അവതരിപ്പിച്ചു. കാലിഫോർണിയയിലായിരുന്നു ഈ സീസണിന്റെ കഥാപശ്ചാത്തലം. 2019ൽ എത്തിയ മൂന്നാം സീസണിൽ മഹെർഷല അലി, കാർമെൻ ഇജോഗോ, സ്റ്റീഫൻ ഡോർഫ് എന്നിവർ പ്രധാന വേഷങ്ങളിലെത്തി. ഓസാർക്സ് മേഖലയായിരുന്നു മൂന്നാം സീസണിന്റെ പശ്ചാത്തലം.
2024ൽ പുറത്തിറങ്ങിയ നാലാം സീസണായ ‘നൈറ്റ് കൺട്രി’യിൽ ജോഡി ഫോസ്റ്ററും കാളി റീസുമാണ് പ്രധാന കഥാപാത്രങ്ങളെ അവതരിപ്പിച്ചത്. അലാസ്കയുടെ മഞ്ഞുമൂടിയ പശ്ചാത്തലത്തിൽ അരങ്ങേറിയ ഈ സീസണും പ്രേക്ഷകശ്രദ്ധ നേടിയിരുന്നു. അഞ്ചാം സീസണിൽ നിക്കോളാസ് കേജും അന്റോണിയോ ബാണ്ടെരസും ഒന്നിക്കുന്നതോടെ പുതിയ കഥയ്ക്കും താരനിരയ്ക്കുമായി കാത്തിരിക്കുകയാണ് സീരീസ് ആരാധകർ.
