തന്റെ വിവാഹത്തെക്കുറിച്ചുള്ള കൂടുതൽ വിശേഷങ്ങൾ പങ്കുവെച്ച് പ്രശസ്ത ഗായിക റിമി ടോമി രംഗത്ത്. മുംബൈയിൽ സ്ഥിരതാമസമാക്കിയ മലയാളിയും ബോഡി ബിൽഡറുമായ ലിബിൻ മാത്യുവാണ് വരൻ. റിമിയുടെ ഫിറ്റ്‌നസ് ട്രെയിനറും കോച്ചും കൂടിയാണ് ലിബിൻ.
ഈ മാസം തന്നെ മുംബൈയിലെ ഡോംബിവല്ലിയിലുള്ള ഒരു ചെറിയ പള്ളിയിൽ വെച്ചായിരിക്കും വിവാഹമെന്ന് താരം വ്യക്തമാക്കി. വളരെ ലളിതമായ ചടങ്ങുകളോടെ നടക്കുന്ന വിവാഹത്തിൽ ചലച്ചിത്രമേഖലയിൽ നിന്ന് അധികം ആരെയും ക്ഷണിക്കുന്നില്ലെന്നും റിമി കൂട്ടിച്ചേർത്തു. കഴിഞ്ഞ മാർച്ച് മാസത്തിലാണ് ഇരുവരും പരിചയപ്പെടുന്നതും പിന്നീട് വിവാഹം കഴിക്കാൻ തീരുമാനിക്കുന്നതും. മുൻ ഭർത്താവിന്റെ ചിത്രം ചേർത്ത് വരുന്ന വ്യാജ പ്രചാരണങ്ങളെ വെറുതെ വിടണമെന്നും അദ്ദേഹം സന്തോഷത്തോടെ ജീവിക്കുന്നുണ്ടെന്നും റിമി വീഡിയോയിലൂടെ അഭ്യർത്ഥിച്ചു.
