സംവിധായകൻ രഞ്ജിത്തിനെതിരെ ഉയർന്ന പുതിയ ലൈംഗികാതിക്രമ പരാതിയുടെയും അദ്ദേഹത്തിന്റെ അറസ്റ്റിന്റെയും പശ്ചാത്തലത്തിൽ, സിനിമാ മേഖലയിലെ സ്ത്രീസുരക്ഷയെക്കുറിച്ച് വീണ്ടും ആശങ്ക രേഖപ്പെടുത്തി വുമൺ ഇൻ സിനിമ കളക്ടീവ് (WCC). കുറ്റാരോപിതർക്ക് സിനിമാ വ്യവസായത്തിനുള്ളിൽ ലഭിക്കുന്ന അമിതമായ പിന്തുണയെയും സംരക്ഷണത്തെയും ഡബ്ല്യുസിസി ചോദ്യം ചെയ്തു. ഇത്തരം കുറ്റവാളികൾക്ക് ഇത്രയധികം ധൈര്യം ലഭിക്കുന്നത് എവിടെ നിന്നാണെന്ന് പ്രസ്താവനയിലൂടെ സംഘടന ചോദിച്ചു. ഹേമ കമ്മിറ്റി റിപ്പോർട്ടിന് ശേഷവും മാറ്റമില്ലാതെ തുടരുന്ന സിനിമാ ലോകത്തെ അധികാരശ്രേണിയെയും ‘പവർ ഗ്രൂപ്പുകളെയും’ സംഘടന രൂക്ഷമായി വിമർശിച്ചു.
സിനിമാ സെറ്റുകളിൽ ആഭ്യന്തര പരാതി പരിഹാര സമിതികൾ (ICC) നിർബന്ധമാക്കണമെന്ന ഹൈക്കോടതി ഉത്തരവുകൾ നിലനിൽക്കെ തന്നെ ഇത്തരം അതിക്രമങ്ങൾ ആവർത്തിക്കുന്നത് ഗൗരവകരമാണെന്ന് ഡബ്ല്യുസിസി ചൂണ്ടിക്കാട്ടി. പലപ്പോഴും ഐസിസി (ICC) വെറും നോക്കുകുത്തിയായി മാറുന്നതായും പരാതി നൽകാൻ എത്തുന്നവരെ പിന്തിരിപ്പിക്കുന്ന സാഹചര്യം നിലനിൽക്കുന്നതായും സംഘടന ആരോപിച്ചു. കുറ്റാരോപിതനായ സംവിധായകനെ പിന്തുണയ്ക്കാൻ സിനിമാ മേഖലയിലെ തന്നെ ചിലർ രംഗത്തെത്തുന്നത് അതിജീവിതയെ കൂടുതൽ ട്രോമയിലേക്ക് തള്ളിവിടുന്നതാണെന്നും പ്രസ്താവനയിൽ പറയുന്നു.
രഞ്ജിത്തിനെതിരായ കേസിൽ കൃത്യമായ അന്വേഷണം നടത്തി നീതി ഉറപ്പാക്കണമെന്ന് ഡബ്ല്യുസിസി സർക്കാരിനോടും പ്രത്യേക അന്വേഷണ സംഘത്തോടും (SIT) ആവശ്യപ്പെട്ടു. സിനിമയിലെ തൊഴിലിടങ്ങൾ സുരക്ഷിതമാക്കാൻ സർക്കാർ പ്രഖ്യാപിച്ച പുതിയ നയങ്ങൾ കടലാസിലൊതുങ്ങരുത്. ഇരയാക്കപ്പെട്ട നടിക്ക് എല്ലാവിധ പിന്തുണയും വാഗ്ദാനം ചെയ്ത സംഘടന, സിനിമാ മേഖലയിലെ ലിംഗവിവേചനത്തിനും അതിക്രമങ്ങൾക്കുമെതിരെയുള്ള തങ്ങളുടെ പോരാട്ടം തുടരുമെന്നും വ്യക്തമാക്കി. രഞ്ജിത്തിനെപ്പോലുള്ളവർക്കെതിരെയുള്ള നിയമനടപടികൾ സിനിമാ രംഗത്തെ മറ്റു ചൂഷകർക്ക് ഒരു പാഠമാകണമെന്നും ഡബ്ല്യുസിസി കൂട്ടിച്ചേർത്തു.
