അമിതാഭ് ബച്ചന്, രശ്മിക മന്ദാന എന്നിവര് പ്രധാന വേഷത്തിലെത്തുന്ന പുതിയ ചിത്രം ഗുഡ്ബൈയുടെ ട്രെയിലര് പുറത്തുവിട്ടു. ഒക്ടോബര് ഏഴിന് ചിത്രം തിയേറ്ററുകളിലെത്തും. ഒരു ഫാമിലി എന്റര്ടെയ്നര് ആയിരിക്കും ഈ ചിത്രമെന്നാണ് ട്രെയിലര് സൂചിപ്പിക്കുന്നത്. വികാസ് ബാല് സംവിധാനം ചെയ്യുന്ന ചിത്രം ബോളിവുഡിന് ഒരു പ്രതീക്ഷ നല്കാന് സാധ്യതയുണ്ടെന്നാണ് റിപ്പോര്ട്ടുകള്. ചിത്രത്തിന്റെ ഫസ്റ്റ് ലുക്ക് പോസ്റ്റര് ഏറെ ശ്രദ്ധ നേടിയിരുന്നു.
ചിത്രത്തില് നീന ഗുപ്ത, പവയില് ഗുലാത്തി, ആശിഷ് വിദ്യര്ത്ഥി, സുനില് ഗ്രോവര്, എല്ലി അവ്രാം, സാഹില് മേത്ത, ഷിവിന് നാരംഗ്, അഭിഷേഖ് ഖാന് എന്നിവരും പ്രധാന വേഷങ്ങളില് അഭിനയിക്കുന്നു. ജൂലൈയില് അമിതാഭ് ബച്ചന്, നീന ഗുപ്ത, രശ്മിക മന്ദാന, പവയില് ഗുലാത്തി എന്നിവര് ടിവിയില് ഒരുമിച്ച് ഒരു കായിക പരിപാടി ആസ്വദിക്കുന്നതും ടീം ഇന്ത്യയെ പ്രോത്സാഹിപ്പിക്കുന്നതുമായ ചിത്രത്തിലെ ഒരു സ്റ്റില് പുറത്തുവന്നിരുന്നു.
ശോഭ കപൂര്, എക്ത ആര് കപൂര് എന്നിവരാണ് ചിത്രം നിര്മ്മിക്കുന്നത്. കഥയും തിരക്കഥയും ഒരുക്കിയിരിക്കുന്നതും വികാസ് തന്നെയാണ്. സുധാകര് റെഡ്ഡിയാണ് ഛായാഗ്രഹണം നിര്വഹിച്ചിരിക്കുന്നത്. സ്വാനന്ദ് കിര്കിറെയുടെ വരികള്ക്ക് അമിത് തൃവേദിയാണ് സംഗീതം നല്കിയിരിക്കുന്നത്. എ ശ്രീകര് പ്രസാദാണ് എഡിറ്റര്.