സാധാരണക്കാരുടെ കഥ പറയുന്ന ഒരു ഫീൽ ഗുഡ് മൂവി. നവാഗതനായ രോഹിത് നാരായണന്റെ സംവിധാനത്തിൽ വിനയ് ഫോർട്ട് നായകനായെത്തിയ സോമന്റെ കൃതാവ് എന്ന ചിത്രത്തെ ഒറ്റ വരിയിൽ ഇങ്ങനെ വിശേഷിപ്പിക്കാം. ചിത്രത്തിന്റെ ടീസറിലെ ‘മൈ നെയിം ഈസ് ഇന്ത്യ’ എന്ന സംഭാഷണം സമകാലിക രാഷ്ട്രീയ ചർച്ചകളിൽ പോലും ഇടം നേടിയിരുന്നു. ചിത്രത്തിന്റെ ഒഫീഷ്യൽ ട്രെയിലർ ദുൽഖർ സൽമാനാണ് തന്റെ ഫേയ്സ് ബുക്ക് പേജിലൂടെ റിലീസ് ചെയ്‌തിരുന്നത്. പ്രതീക്ഷിച്ചതു പോലെ തന്നെ ചിരിക്കാനും ചിന്തിക്കാനുമുള്ള ചിത്രമാണ് സോമന്റെ കൃതാവ്. ഒരു കംപ്ലീറ്റ് കോമഡി എന്‍റര്‍ടെയ്നറായി ഒരുക്കിയിരിക്കുന്ന ചിത്രം കൂടിയാണ് സോമന്റെ കൃതാവ്. വ്യത്യസ്തമായ ഗെറ്റപ്പിൽ കുട്ടനാട്ടുകാരനായ കൃഷി ഓഫീസറുടെ വേഷത്തിലാണ് വിനയ് ഫോർട്ട് ചിത്രത്തിൽ എത്തുന്നത്. എൺപതുകളിലെ പഴയ ഹിപ്പി സ്റ്റൈലിൽ കൃതാവ് വച്ച് വിചിത്ര സ്വഭാവം കൊണ്ട് നാട്ടുകാരുടെ പരിഹാസത്തിന് പാത്രമായ മനുഷ്യനാണ് സോമൻ. പ്രകൃതിയോടിണങ്ങിയാണ് വില്ലേജ് കൃഷി ഓഫിസറായ സോമന്റെ ജീവിതം. വിചിത്ര സ്വഭാവമുള്ള സോമൻ നാട്ടിലാകെ ചർച്ചാവിഷയമാണ്. കല്യാണം കഴിയുന്നതോടെ സോമന്റെ ജീവിതം മാറുമെന്ന് എല്ലാവരും കരുതുന്നു. പക്ഷെ ആധുനിക വൈദ്യ ശാസ്ത്രത്തെ അംഗീകരിക്കാത്ത സോമൻ ഭാര്യയെ പ്രസവിക്കാൻ പോലും ആശുപത്രിയിലേക്ക് വിടുന്നില്ല. എന്ത് അസുഖം വന്നാലും വീട്ടിൽ ചികിൽസിച്ചാൽ മതി എന്നാണ് സോമൻ സുഹൃത്തുക്കളെ ഉപദേശിക്കുന്നത്. കക്ഷി അമ്മിണിപ്പിള്ള, ഫേസ്, ഡൈവോഴ്സ് തുടങ്ങിയ ചിത്രങ്ങളിലൂടെ ശ്രദ്ധേയയായ ഫറാ ഷിബിലയാണ് നായിക. മനോഹരമായ ആലപ്പുഴയുടെ ഭംഗി ഒപ്പിയെടുക്കുന്ന ദൃശ്യ വിരുന്ന് ഒരുക്കുന്നതിൽ ചിത്രം പ്രത്യേക പ്രശംസ തന്നെ പിടിച്ച് പറ്റുന്നുണ്ട്. സാധാരണക്കാരുടെ നിരവധി ജീവിത സങ്കീർണതകളെ ചിത്രം അടയാളപ്പെടുത്തുന്നുണ്ട്. കുട്ടനാട്ടിലെ താറാവ് കർഷകരടക്കം നേരിടുന്ന പ്രതിസന്ധി ചിത്രം ചർച്ച ചെയ്യുന്നു. വ്യത്യസ്ത വേഷത്തിലെത്തിയ വിനയ് ഫോർട്ട്, നായിക ഫറ ഷിബില, ബാല താരം ദേവ നന്ദ തുടങ്ങിയ അഭിനേതാക്കൾ മികച്ച പ്രകടനം തന്നെ കാഴ്ച വെച്ചിട്ടുണ്ട്.
തിരക്കഥാകൃത്ത് ബിപിൻ ചന്ദ്രൻ, മനു ജോസഫ്, ജയൻ ചേർത്തല, നിയാസ് നർമ്മകല, സീമ ജി.നായർ എന്നിവർക്കൊപ്പം ചിത്രത്തിലെ നാടൻ കഥാപാത്രങ്ങൾക്ക് അനുയോജ്യരായ നാട്ടുകാരെ കണ്ടെത്തി അഭിനയ പരിശീലനത്തിൽ പങ്കെടുപ്പിച്ചവരിൽ നിന്നും തിരഞ്ഞെടുത്ത പതിനാറിലധികം പുതുമുഖങ്ങളും ഈ ചിത്രത്തിൽ അഭിനയിക്കുന്നു. ഓൺ സ്റ്റേജ് സിനിമാസ് അവതരിപ്പിക്കുന്ന ചിത്രം, മാസ്റ്റർ വർക്‌സ് സ്റ്റുഡിയോസ് മിഥുൻ കുരുവിള, രാഗം മൂവീസ്സ് രാജു മല്ല്യത്ത് എന്നിവർ ചേർന്ന് നിർമിക്കുന്നു.’ഉണ്ട’, ‘സൂപ്പർ ശരണ്യ’ എന്നീ സൂപ്പർഹിറ്റ് ചിത്രങ്ങളിൽ ഛായാഗ്രാഹണം നിർവഹിച്ച സുജിത്ത് പുരുഷൻ ആണ് ഛായാഗ്രാഹണം. രഞ്ജിത്ത് കെ. ഹരിദാസ് കഥയും തിരക്കഥയും സംഭാഷണവും എഴുതുന്നു. സംഗീതം പി.എസ്. ജയഹരി, എഡിറ്റർ ബിജീഷ് ബാലകൃഷ്ണൻ, പ്രൊഡക്ഷൻ കൺട്രോളർ ഷബീർ മലവെട്ടത്ത്, കല അനീഷ് ഗോപാൽ, മേക്കപ്പ് ജയൻ പൂങ്കുളം, വസ്ത്രാലങ്കാരം അനിൽ ചെമ്പൂർ, സ്റ്റിൽസ് രാഹുൽ എം. സത്യൻ, ചീഫ് അസോസിയേറ്റ് ഡയറക്ടർ റ്റൈറ്റസ് അലക്‌സാണ്ടർ, അസോഷ്യേറ്റ് ഡയറക്ടർ റെനിറ്റ് രാജ്, അസിസ്റ്റന്റ് ഡയറക്ടർ പ്രശോഭ് ബാലൻ, പ്രദീപ് രാജ്, സുഖിൽ സാഗ്, അസോസിയേറ്റ് ക്യാമറമാൻ ക്ലിന്റോ ആന്റണി, പ്രൊഡക്ഷൻ എക്‌സിക്യൂട്ടീവ് അനിൽ നമ്പ്യാർ, ബർണാഡ് തോമസ്, പിആർഒ എ.എസ്. ദിനേശ്.