തീയറ്ററുകളിൽ കണ്ണീർ നിറച്ച് കയ്യടിയും നേടി ബ്ലെസിയും പൃഥ്വിരാജ് ചിത്രം ആടുജീവിതം പ്രദർശനം തുടരുകയാണ്. ബ്ലെസ്സിയുടെയും പൃഥ്വിരാജിന്റെയും വർഷങ്ങൾ നീണ്ട കഠിനാധ്വാനത്തിന് ഏറ്റവും മികച്ച ഫലം തന്നെയാണ് ലഭിച്ചിട്ടുള്ളത്. പൃഥ്വിരാജിന്റെ മികച്ച പ്രകടനത്തിന് മികച്ച പ്രതികരണങ്ങൾ വരുമ്പോൾ താരത്തിന്റെ അമ്മ മല്ലിക സുകുമാരന്റെ വൈകാരികമായ കുറിപ്പാണ് സോഷ്യൽ മീഡിയയിൽ വൈറലാകുന്നത്.
സുകുമാരന്റെ ചിത്രമുള്ള വീഡിയോയോടൊപ്പമാണ് മല്ലിക സുകുമാരൻ കുറിപ്പ് പങ്കുവെച്ചിരിക്കുന്നത്. “പൃഥ്വിയിലൂടെ നജീബിനെ കണ്ട് വിങ്ങുന്ന ഹൃദയവുമായി എന്നെ വിളിക്കുന്ന സഹോദരികളും പെൺകുട്ടികളും… കണ്ഠമിടറി എൻ്റെ മോനെ അഭിനന്ദിച്ചു കൊണ്ട് സംസാരിച്ച തീയേറ്റർ ഉടമകൾ….. മല്ലികച്ചേച്ചി ഇതെങ്ങിനെ കാണും എന്ന് സ്നേഹത്തോടെ ചോദിക്കുന്ന കലാ സ്നേഹികൾ…. എന്തു പറയണം എന്നറിയില്ല പ്രിയപ്പെട്ടവരേ…. ഈശ്വരന് നന്ദി .. ബ്ലെസ്സിക്കും ബെന്യാമിനും നന്ദി…” എന്നാണ് മല്ലിക സുകുമാരൻ കുറിച്ചത്.
അതേസമയം, ആടുജീവിതം സിനിമയിലൂടെ കരിയറിലെ ഏറ്റവും വലിയ വിജയത്തിലേക്ക് കുതിക്കുകയാണ് പൃഥ്വിരാജ്. ആഗോളതലത്തിൽ ആടുജീവിതം റിലീസ് ദിനം 16 കോടി രൂപയിൽ അധികം നേടിയതായാണ് റിപ്പോർട്ട്. ഇതു ഒരു റെക്കോർഡാണ്. 2024ൽ പ്രദർശനത്തിനെത്തിയ തെന്നിന്ത്യൻ ചിത്രങ്ങളുടെ കളക്ഷനിൽ രണ്ട് എണ്ണം മാത്രമാണ് ഇക്കാര്യത്തിൽ പൃഥ്വി ചിത്രത്തിന് മുന്നിലുള്ളത്. ഒന്ന് തേജ സജ്ജയുടെ ഹനുമാനാണ്. മറ്റൊന്ന് മഹേഷ് ബാബുവിന്റെ ഗുണ്ടുർ കാരമാണ്.