കണ്ണൂർ സ്ക്വാഡ്, കാതൽ എന്നീ ഹിറ്റുകൾക്ക് ശേഷം ഹാട്രിക്ക് വിജയം എന്ന ലക്ഷ്യത്തോടെയാണ് മമ്മൂട്ടിയുടെ ഭ്രമയുഗം ഒരുങ്ങഉന്നത്. പ്രഖ്യാപനം മുതൽ ഫസ്റ്റ് ലുക്ക് വരെ പ്രേക്ഷകരെ ത്രസിപ്പിക്കുന്ന കാര്യത്തിൽ ഭ്രമയുഗം വിജയിച്ചിരുന്നു. ചിത്രത്തിന്റെ റിലീസ് സംബന്ധിച്ച ചർച്ചകളാണ് സോഷ്യൽ മീഡിയയിൽ ഇപ്പോൾ നടക്കുന്നത്.
2024 ഫെബ്രുവരിയിൽ ഭ്രമയുഗം റിലീസ് ചെയ്യുമെന്നാണ് ചില വിവരങ്ങൾ പുറത്ത് വന്നിട്ടുള്ളത്. ഇക്കാര്യത്തിൽ ഔദ്യോഗികമായി അറിയിപ്പുകൾ ഒന്നും തന്നെ വന്നിട്ടില്ല. നേരത്തെ ജനുവരി ആദ്യവാരം സിനിമ തിയറ്ററിൽ എത്തുമെന്ന് അറിയിപ്പ് വന്നിരുന്നു. മോഹൻലാലി‍ന്റെ മലൈക്കോട്ടൈ വാലിബൻ ജനുവരി 25നാണ് റിലീസ് ചെയ്യുന്നത്. ഈ സിനിമയ്ക്ക് മുൻപോ ശേഷമോ ആയിരിക്കും ഭ്രമയുഗം റിലീസ് ചെയ്യുക എന്നാണ് വിലയിരുത്തലുകൾ.
ഹൊറർ ത്രില്ലർ വിഭാഗത്തിലുള്ള സിനിമയാണ് ഭ്രമയുഗം. മലയാളം, തമിഴ്, തെലുങ്ക്, കന്നഡ, ഹിന്ദി എന്നീ ഭാഷകളിലായി റിലീസ് ചെയ്യും. പ്രൊഡക്ഷൻ ഹൗസായ നൈറ്റ് ഷിഫ്റ്റ് സ്റ്റുഡിയോസിന്റെ ബാനറിൽ, രാഹുൽ സദാശിവൻ ആണ് ചിത്രത്തിന്റെ രചനയും സംവിധാനവും നിർവഹിച്ചിരിക്കുന്നത്. അർജുൻ അശോകൻ, സിദ്ധാർത്ഥ് ഭരതൻ, അമൽദ ലിസ് എന്നിവരാണ് മറ്റ് പ്രധാന കഥാപാത്രങ്ങൾ.