ഡോൺ ലീ എന്നറിയപ്പെടുന്ന കൊറിയൻ നടൻ മാ ഡോങ്-സിയോക്ക് വിവാഹിതനാകുന്നു. കാമുകി യെ ജംഗ്-ഹ്വയുമായുള്ള വിവാഹ ചടങ്ങുകൾ അടുത്ത മാസം നടക്കുമെന്നാണ് റിപ്പോർട്ടുകൾ. 2021ൽ ഇരുവരും രഹസ്യമായി വിവാഹം രജിസ്റ്റർ ചെയ്തതിരുന്നു എന്ന വാർത്തകൾ പ്രചരിച്ചിരുന്നു. പിന്നാലെയാണ് വിവാഹ ചടങ്ങുകളെ കുറിച്ചുള്ള റിപ്പോർട്ടുകളും പുറത്ത് വന്നിട്ടുള്ളത്.
ഡോൺ ലീയും ജംഗ്-ഹ്വയും 2016 മുതൽ ഡേറ്റിംഗിലാണ്. കൊവിഡ് 19 അടക്കമുള്ള പ്രശ്നങ്ങൾ കാരണമാണ് 2021ൽ വിവാഹ ചടങ്ങുകൾ വയ്ക്കാതിരുന്നത് എന്നാണ് താരത്തോട് അടുത്ത വൃത്തങ്ങൾ പറയുന്നത്. അതേസമയം, കുടുംബാംഗങ്ങൾക്കും സുഹൃത്തുക്കൾക്കും മാത്രമാണ് ചടങ്ങിലേക്ക് ക്ഷണമെന്നും വിവരമുണ്ട്.
കേരളത്തിൽ അടക്കം ഏറെ ആരാധകരെ സൃഷ്ടിച്ച താരമാണ് ഡോൺ ലീ. കൊറിയൻ ലാലേട്ടൻ എന്നാണ് താരത്തെ സ്നേഹത്തോടെ മലയാളി ആരാധകർ വിളിക്കുന്നത്. ദ റൌണ്ടപ്പ്, ഔട്ട് ലോസ് പോലുള്ള ചിത്രങ്ങളിലെ ഡോൺ ലീയുടെ പൊലീസ് വേഷങ്ങൾ ഏറെ ശ്രദ്ധിക്കപ്പെട്ടിരുന്നു. കൂടാതെ, ഏറ്റെണൽസ് അടക്കം ഹോളിവുഡ് ചിത്രങ്ങളിലും താരം അഭിനയിച്ചു.